KORSOU BOU DI INFLUENSIA DI EL NIÑO  

Willemstad,- Dia 10 di sèptèmber a marka e pik di temporada di orkan pa Oseano Atlántiko i Karibe. Meteo ta informá ku solamente 5 Siklon tropikal a forma i a desaroyá komo tormenta tropikal den nos regio. No tabata tin ningun sistema ku a sigui desaroyá i bira un orkan.

Normalmente, alrededor di 7 siklon tropikal, den kua 3 orkan ta desaroyá den e promé mitar di e temporada.  Den e kuadro aki, por indiká ku 2026 lo kibra e rèkort, mirando ku e promé orkan di temporada no a forma ainda.

Aña 2002 tin e rèkort aktual ku formashon di e promé orkan, ku tabata dia 11 di sèptèmber (Gustav). Mirando e situashon den Oséano Atlántiko i Karibe, ta premirá ku den e próksimo siman lo no tin desaroyo pa un siklon tropikal.

Tur esaki ta relashoná ku e fenómeno El Niño ku ta dominá e kondishonnan atmosfériko den laman Karibe. El Niño ta e fenómeno klimatológiko di oséano tropikal pasífiko ku ta hasi e temperaturanan di superfisie di oséano mas kalor ku normal. E temperatura den en último lunanan ya a superá 1.8 °C riba e averahe di 27.5 °C.
El Niño ta okashoná bientunan mas fuerte na nivel haltu den Karibe.

Manera a pronostiká for di den luna di mei 2026, e fenómeno El Niño su intensidat lo por yega na 2.4 °C. Esaki lo ta riba e averahe ku ta komparabel ku e fenómeno di El Niño di añanan 1982-1983 i 1997-1998.

Ta bon pa rekordá ku El Niño na aña 1983 a okashoná hamber na Afrika, i pa rekoudá fondo, artistanan internashonal a saka un kantika na komienso di aña 1985 titulá “We are the World”.

E temperatura máksimo i áwaseru di temporada ku a registrá na

1982: 33.6 °C riba dia 25 ougùstùs, 380 mm anual

1997: 34.6 °C riba dia 3 òktober,  324 mm anual

Pa e aña aki Meteo ta pronostiká ku e temperaturanan por yega 33.5-34.1 °C kual por okashoná dianan sofokante ora ku no tin sufisiente bientu.

Áwaseru total pa e aña lo yega alrededor di 350 mm, kual ta mitar di total anual, pues un défisit di áwaseru.

Mirando e impaktonan espesialmente di kalor ekstremo, Meteo ta konsehá pa tuma medida di prekoushon ora ta hasi kualke aktividat pafó, dor di bebe hopi awa i evitá hasi dimas esfuerso den oranan kalor.
Si bo no ta sinti bo mes bon, deskansá den sombra mas pronto posibel. Komo medida di largu plaso ta bon pa kuminsá retené palunan ku ta trese sombra of  planta mas palu.

FUENTE: METEO KORSOU/LIVE99FM