UN DIA DESPUES KU E KOALISHON ENTRE PARTIDO DEMOKRAT, M21 I FRAKSHON VROLIJK A PÈRDÈ SU MAYORIA, E LIDER POLÍTIKO DI E KOALISHON TUR TÒRMENTÁ A APARESÉ DEN E PROGRAMA POPULAR ‘NA KAMINDA PA BRUNCH’ NA LIVE FM. E PROGRAMA A DUNA UN BISTA INTERESANTE DI UN LIDER POLÍTIKO I UN SPIL INPENETRABEL DI EGAÑO POLÍTIKO PROPIO.

Kralendijk,- E lider polítiko a haña palabra ilimitá pa splika dikon su koalishon i su gobièrnu a pèrdè su mayoria.

Pero loke ela hasi en realidat tabata duna un asina yamá ‘masterclass’ den engaño propio. Un fenómeno sikológiko mes fasinante ku e ta trágiko pa kualke hende ku eksperensi’é. E lider polítiko su narativo tabata bon kla: e ta e víktima. E úniko ku ta wòrdu ataká. E úniko ku ta wòrdu tené responsabel. Dikon? Pasobra ela risibí mas tantu voto, naturalmente. Den su narativo, e ta simpel: éksito ta hasibo un blanko. Pero esaki ta e promé blòki den un muraya di nengamentu ku ela konstruí kuidadosamente rònt di su mes.

E patronchi aki—e eksternalisashon konstante di responsabilidat—ta un mekanismo di defensa sikológiko klásiko. Sikólogonan ta yam’é bias (tendensia) di atribushon: e tendensia pa atribuí bo mes erornan na faktornan eksterno, miéntras ta atribuí e erornan di otronan na nan karakter. E lider polítiko ta hasi eksaktamente lo kontrario: tur loke bai robes no ta su kulpa, sino di otronan. Su mes sirkulo “no sa nada di un tópiko” ora nan tres’é dilanti. Pero ora e papia, e ta arogante.

Laga nos definí kiko ta den wega aki: esakinan ta karakterístikanan klásiko di rasgonan di personalidat narsista. No nesesariamente un desòrdu kompleto, pero un patronchi ku ta impaktá profundamente kon e lider polítiko aki ta kumpli ku su ròl. Na promé lugá: e nesesidat pa atmirashon i e intoleransia pa krítika. E lider polítiko ta sintié ataká ora un hende ta opon’é. Esaki no ta inusual—hopi polítiko ta sinti asina. Pero su reakshon ta karakterístiko: e ta retirá den un avalancha di defensa propio. Si un hende ta oponé, nan no por tin rason; nan tin ku atak’e.

No tin espasio pa e idea ku e mes por ta robes.

Di dos: e outo-estima grandioso mesklá ku sensitividat ekstremo pa krítika. E lider polítiko ta pretendé ku e ta asta bai na kas di e mama di e ex miembro di frakshon di partido demokrat den konseho insular, kaminda ela wòrdu atendé seriamente. Dikon mester trese algu asina dilanti nos no sa pero e detaye aki ta konta. En bes di mira esaki komo un spièrtamentu—ku asta miembronan di famia di su koleganan ta dirigí nan mes na dje—e ta mir’é komo evidensia di su mania di persekushon. E echo ku e “tambe tin famia” ta sugerí ku e ta mira su mes den un ròl di víktima, komo si fuera ta inhustu ku e ta wòrdu kritiká.

Di tres: e inkapasidat pa tuma responsabilidat. Desde kabamentu di 2023 bin ariba e lider polítiko a hasi un “desorden enorme” komo diputado di Finansa. Esaki no ta nos karakterisashon—esaki ta kon otronan ta mir’é, i e ta un akusashon serio. Pero den su mes narativo? E no ta responsabel pa e desorden ei. E ta víktima di sirkunstansianan, di mal komprondementu, di jaloersheid.

Loke ta kompletá e potrèt ta e historia: e lider aki nunka no a kompletá un término kompletu. Dos diputado kápas, un mas ku e otro diripente a tuma retiru i a bai sin duna un motibu dikon. Pero tur kos ta mustra ku realmente nan a fada di e manera di anda di e lider polítiko aki. Segun un miembro di e frakshon di UPB aktualmente e lider polítiko aki ta den pelea fuerte ku su kolega i alabes diputado di finansas. Kada bes, e kos ta kaba di e mesun manera: e mester wòrdu remplasá, ta renunsiá forsosamente, òf t wòrdu mandá kas ku un voto di deskonfiansa. Esaki no ta un koinsidensia. E ta un patronchi.

Pero aki ta e detaye krusial ku ta pone tur kos den un lus diferente: E lider polítiko den e programa na kaminda pa Brunch a trese repetidamente dilanti ku ela pone tur su posishon- i funshonnan na disposishon di partido pasobra esakinan no ta tur kos. I tòg—kada biaha—e partido a disidí di mantené. E echo aki ta hopi revelador sikológikamente. Esaki no ta e komportashon di un hende ku sirkunstansianan ta strob’é. Esaki ta e komportashon di un hende ku no por laga poder bai, asta ora nan mes ta indiká ku nan no ta interesá. Esaki ta e komportashon di un hende ku no ke e posishon, pero ke e status, influensia i rekonosementu ku ta bin kuné.

Sikólogonan ta rekonosé un patronchi sikológiko profundo den esaki: e diferensia entre ke poder i ke e sintimentu di poder. E lider polítiko no ke ta realmente un diputado—e ke sintié indispensabel. E ke wòrdu supliká pa keda. E ke pa hende bisa: “Nos no por biba sin bo. Esaki ta splika tambe pakiku e ta keda bolbe bin bèk den mesún posishon i funshon. No ta pasobra e ta gusta. Ta pasobra e no por soportá ku otronan no tin mester di dje. Den su pensamentu ta partido mes a mantené i asina validá su balor propio. Tanten ku nan mantené, e ta balioso.

Tanten ku nan ta roga pa e keda, e ta importante.

E patronchi aki ta revelá algu mas profundo: e lider polítiko ta dependiente di validashon eksterno. E ta bisa ku e posishonnan no ta interes’é, pero e no por entregá nan. Esaki no ta un señal di forsa—e ta un señal di outo-estima sumamente frágil. Un lider sano lo bisa: “Mi no ta interesá den esaki mas, mi ta bai.” I despues e ta bai.

Pero e lider polítiko aki a bis’é, i despues e ta keda. Dikon? Pasobra e momentu ku e bai realmente ta e momentu ku e tin ku rekonosé ku e no ta indispensabel. E momento ku e tin ku aseptá ku e partido por funshoná sin dje. E momentu ku e tin ku atmití ku ela faya.

Loke e lider aki mester no ta defensa. Loke e mester ta yudansa—no dor di mantené, sino dor di lag’é bai. Dor di pèrmiti’é bai di bèrdat. Dor di dun’é e chèns pa re-inventá su mes, pafó di poder, pafó di status, pafó di e nesesidat pa validashon eksterno. Loke Boneiru mester ta un partido ku tin e kurashi di skohe klaridat. Un partido ku tin e kurashi di bisa: “Esaki no ta funshoná mas. Nos tin ku kambia.” I netamente e mensaje klave aki Salma Serberie a manda pa partido i Boneiru den su karta pa gezaghèber.

FUENTE:WILLEM CECILIA