KI MAS BUNITA REGALO PA RIBA DIA DI MI KUMPLEAÑOS KOMPARTÍ KU KOMUNIDAT EN GENERAL I E KOMPANIA SELIBON I MUI EN ESPESIAL E TRAHADÓNAN DI SELIBON E REGALO KU SINDIKALISMO A LOGRA, ESTA UN SELIBON RIBA KAMINDA PA UN ESTILO NOBO.

Kralendijk,- Pues un Selibon ku finansieramente/ekonómikamente saludabel, pues ku su eksistensia ta garantisá i kuné ta garantisá kuponan di trabou bou di kondishon i sirkumstansianan saludabel i un Selibon ku lo kumpli ku su tareanan primordial esta di rekohé i prosesá sushi riba nos isla.

Na 2022 AFBW a logra drecha i mehorá e kondishonnan laboral di e trahadónan di Selibon ku pa años a keda deskuidá i maltratá. No tabatin rèspèt, ni rekonosementu di e trahadó di Selibon i komo tal no tabata rekompensé den un forma digno.

Ku konvikshon i determinashon AFBW a sinta na mesa i a konvensé gerensia di Selibon i hasta ku preshon riba gobernashon pa pone fondonan adishonal pa por a realisá un CAO na drechi pa e periodo 2022 te ku 2024. Na e mesun momento AFBW a señalá ku e kompania despues di 30 aña mester drenta den un era nobo pa por kumpli ku su tareanan na bienestar di medio-ambiente, naturalesa, salubridat públiko i ekonomia di Boneiru.

Tambe AFBW a mustra riba e sirkumstansianan laboral pésimo, peligroso i insaludabel ku e trahadónan mester a ehersé nan labor di tur dia. I no ménos importante AFBW a mustra den un rapòrt ku Selibon téknikamente tabata bankarota i ku si no intervení, e kompania lo no a sobrebibí ku e konsekuensianan serio primeramente pa trabou, pero alabes pa e medio-ambiente, naturalesa, salú públiko i ekonomia di Boneiru.

Esaki tabata e promé fase den e strategia sindikal, esta señalá ku prueba i dokumentashon e problema serio ku e kompania tabata enfrentá ku tur su konsekuensianan.

Mirando ku e stakeholdersnan, esta gerensia di Selibon, hunta di komisario, akshonista di Selibon esta BHM i gobièrno di Boneiru i Konseho Insular no a tuma e atversensia sindikal na serio, AFBW a drenta e siguiente fase, esta usa su instrumentu legal mas pisá, kual tabata un paro total di trabou na Selibon den luna di aprfel 2023.

Esaki pa komunidat kompleto a realisá e importansia di e servisio di rekohé i prosesá sushi riba nos isla. 4 dia largu e trahadónan di Selibon a sakrifiká nan entrada, pues nan salario, pa e mensahe di e seriedat i urgensia di e kaso penetrá serka esnan responsabel pero tambe serka komunidat. Un paro di trabou no pa mas sèn, sino pa sirkumstansianan laboral.

Korte di hustisia a komprondé e lucha aki kompletamente i a konsehá partidonan pa bai mesa i buska huntu solushon. Esaki a tuma lugá tambe, pero atrobe ehekushon di esaki a stanka, a tarda i no a tuma lugá pa falta di toma di desishon di esnan responsabel i pa falta di fondonan pa ehekutá.

Konsekuentemente e situashon e empeorá no solamente pa trahadónan di Selibon, sino tambe pa henter komunidat en general i esnan mas serka di Lèntfel ku a kuminsá sufri bou di e konsekuensianan direkto di no tin un maneho kla i konsistente pa prosesá e toneladas di sushi ku Boneiru ta produsí diariamente i ku solamente ta oumentá sin ku tin un solushon pa esaki.

Despues di e paro di trabou na aprel 2023, AFBW a konvensé e trahadónan pa duna espasio na gerensia i a alargá e CAO pa un aña kompleto den 2025, pero pa loke ta e sirkumstansianan laboral si e situashon a empeorá di tal forma ku poko poko pero sigur e tabata birando insoportabel pa e trahadónan por a ehersé nan trabou den un ambiente sigur, no peligroso, i un ambiente saludabel, esta ku protekshon pa nan salú.

Despues di a warda dos aña ku pasenshi i kreando espasio pa esnan responsabel buska un solushon pa e problemanan urgente i solushon pa término largu, AFBW a manda fin di ougùstes di e aña aki un señal fuerte i klarito ku trahadónan no por sigui mas i ku sindikalismo lo drenta den akshon si ta nesesario pa tur hende realisá e seriedat i urgensia di e situashon.

Promé ku AFBW lo a tuma kualkier paso, a hasi e petishon pa tur responsabel bin huntu pa atendé e problema serio aki. Un biaha mas sindikalismo a usa su lema ku konstruí brùg pa yega na otro semper lo duna mihó resultado ku lanta muraya i separá for di otro. E logronan di 25 kompania afiliá na AFBW. e mas ku mil trahadó miembro di AFBW i e éksito di e fórmula aki pa a tene Bonlab habrí tabata duna sindikalismo sufisiente konfiansa i konvikshon ku mester purba e kaminda aki promé ku kualkier otro akshon.

Diálogo ku argumentunan sano  i konvinsente lo vense semper. Ku e posishon aki sindikalismo a habri e kaminda pa drenta e fase final, esta e solushon ku tin awe riba mesa. Den parti dos di e kolumna aki, por lesa konkretamente kiko sindikalismo a logra ku e strategia aki.

FUENTE: NÒCHI WILLEM/LIVE99FM