PLATAFORMA BONEIRU NOBO I MAS OUTÓNOMO (PBNO) TA EKSPRESÁ SU GRAN PREOKUPASHON PA LOKE TA TRATA E DESAROYO RESIÉN RONDÓ DI E ASINA YAMÁ ‘SENIORENREGELING’,

Kralendijk,- Pa no papia mes di  e korekshon públiko di diputado Tony Weber dor di su mes partido M21. Ta papia di aklarashon pero kon ku PBNO a lesa e deklarashon di diputado Weber dentro di diferente konteksto, nos no ta yega na e konklushon ku esaki tabata un ‘aklarashon’.

Esaki ta mustra bon kla ku despues di instalashon di dos diputado nobo, nada no a kambia den e estilo di e koalishon. Politika di poder ta konta mas ku bon gobernashon, empatia òf kolaborashon.

Loke ta hasi e situashon aki mas preokupante ainda, ta e intervenshon di M21 pa korigí su mes diputado públikamente, promé ku e tabatin e oportunidat pa atendé e asuntu komo mandatario i enbolbí e stakeholdernan konserní.

Esaki ta un violashon flagrante di e prinsipionan di un sistema di gobernashon dualista, den kua mester duna mandatarionan e libertat pa aktua independientemente i na ínteres general. En bes di esei, nos ta mira un tendensia monístiko, kaminda interesnan di partido i disiplina di koalishon ta prevalesé riba e integridat di e proseso atministrativo.

E análisis di dr. Willem Cecilia pa loke ta trata e kambionan di poder den Bestuurscollege (2023–2025) ta mustra ku nos ta den un patrónchi repetitivo: falta di programa di gobèrnashon, divishon interno, krisis di liderato i mesún kultura di konfrontashon. Awe, ku dos diputado nobo, ta keda demostrá ku e koalishon aktual no tin sintimentu i empatia i ku e tendensia negativo aki lo por kontinuá te na elekshon di 2027.

Pueblo di Boneiru meresé un gobièrnu enfoká riba bienestar komun, habrí pa diálogo, i kapas pa buska situashonnan win-win ku ta duna un sentido di hustisia na tur enbolbí, asta despues di un sentensia di korte. Esaki no ta bon gobernashon; e ta perpetuá un siklo destruktivo ku ta stroba Boneiru su desaroyo i bienestar.

E tendesia aki no solamente ta un problema di politika, e ta un asalto riba derecho i dignidat di e pueblo Boneriano. Ora un gobièrnu riba òrdu di koalishon no ta buska solushon husto i humano, i lei ta duna tur espasio pa esaki, e ta manda un mensahe kla i raspá: e bos, e derechonan i e bienestar di nos komunidat en general, i spesífikamente di e ámptenarnan no ta konta.

FUENTE: DR. WILLLEM A. CECILIA (PBNO)