Redakshon
Kralendijk,- Tin diferente opservashon, akusashon, defensa, disgustu i tambe asko den polítika. Mester diskutí a base di konosementu kon maneho di Bonaire ta funshoná.
Tira falta, zundra, deseá otro kos malu, usa palabra malu, bira personal i defendé lidernan sin tin noshon kiko ta un estado di derecho loke no ta aportá na bienestar di siudadanonan.
Pa esnan ku ta defendé koalishon tin e dicho: “Loko no por tei, anto sabí paga ponchi p’e bai Punda” ku ta nifiká, ta un estupides molestiá kurpa pa otro hende probechá.
Mi ta papia di krísis pa motibu ku ningun hende a antisipá ku dos diputado a tuma retiru, ku komunikashon ta parsial i no ophetivo, ku gezaghèber a tuma mando i pidi pa normalisá e situashon pa evitá pió, Esnan ku a tuma retiru no ke splika pueblo kiko a pasa i kiko nan a logra komo diputado i ku si nan konseheronan tambe a tuma retiru.
Konseho Insular, skohe pa pueblo, no ta yama reunion di urgensia. A skohe netamente pa reunion despues di 10 di ougùstùs pa motibu ku 10 di ougùstùs Partido Demokrat ta selebrá su 71 aña di eksistensia i lo bai tin fiesta grandi ku misa, resèpsi i presentashon di kandidato pa bira “vakgedeputeerde” huntu ku e otro “vakgedeputeerde” di M21.
Lo mester bini repartishon di tarea i sigur, bienestar di animal, diáspora i remigrashon, konektividat i inovashon, derecho di queer community, ekonomia pa introdusí lei di cannibis i asuntunan intergubernamental i regional pa sigui biaha mester bai pa e diputado di M21.
E diputadonan nobo lo ta mas “gedupeerden” ku “gedeputeerden” i mester balia riba tono di nan partido ku ta forma koalishon i mester subi lista pa elekshon. Lo lanta duda den boso integridat, ophetividat i independensia. Na hulandes e dicho ta : “Wiens brood men eet diens woord men spreekt”. Na papiamentu: “Bo tin ku kome pan ku diabel a mansa”
FUENTE: ARTHUR SEALY/LIVE99FM
GIPHY App Key not set. Please check settings