E SITUASHON POLÍTIKO GUBERNAMENTAL KU A SURGI DESPUES KU DEN UN FORMA DI SORPRESA DOS DIPUTADO PAREU A TUMA RETIRO TA ILUSTRÁ KON PROFUNDO POLITIKA DI PAIS, NO POLITIKA DI PARTIDO TA INFLUENSHÁ NOS BIDA DIARIO.

Kralendijk,- Nos ta den un situashon úniko ku nunka antes den Antia Ulandes i sigur despues di 10-10-10 nos no a eksperenshá. Gobernashon di Boneiru ta den man di gezaghèber, ounke ta temporal.

E último biaha despues di 10-10-10 ku nos a eksperenshá ku a kita Bestuurscollege i hasta Konseho Insular for di den funshon, ta momento ku Ulanda a intervení na Statia pa entre otro mal maneho finansiero i lucha pa poder personal.

A disolvé Konseho Insular i a saka otro gobernantenan esta e diputadonan i gezaghèber for di nan funshon i a nombra un komisario di gobiernu Ulandes. Aki nos no a yega asina leu, ya ku nos leinan a premirá kon ta resolvé temporal un situashon asina, ora e surgi.

Mi ta pone enfasis riba temporal, pasobra mester laga e proseso demokrátiko funshoná, pero no laga e 9 polítikonan ku aktualmente ta den Konseho Insular balotá ni supestimá e situashon serio aki. Meskos ku boso a tuma e trabou noble di representá nos komo pueblo, riba boso skouder tin e responsabilidat pisá pa mas lihé posibel tin un Bestuurscollege kompleto ku sosten di mayoria den Konseho Insular pa sigui goberná nos isla. Nos pueblo no meresé e situashon aki i sigur no pa e dura largu.

Ta opvio ku sindikalismo, meskor ku tur otro gremio ta preokupá ku e situashon ya ku e ta un sla duru pa kredibilidat di gobernashon ku ta e instituto ku mester garantisá stabilidat di maneho, kontinuidat di maneho i asina inspirá konfiansa pa nos por traha na un desaroyo sosial-ekonómiko duradero i asina brinda nos pueblo un futuro briante.

E análisis ku sindikalismo a hasi for di e informashonnan ku a subi den prensa ku en bes di traha huntu nos gobernantenan a i ta traha kontra otro. Pa sirbi interes di komunidat i no di partido i/o personal ta nesesario pa pensa konhuntu riba solushonnan konkreto pa e problemanan ku diariamente nos komunidat ta konfrontá.

Pa falta di konfiansa no ta habrí pa kritika riba funshonamentu òf jùist falta di funshonamentu. En bes di mira esaki komo oportunidat pa drecha e relashon bou di otro ku lo por kondusi na adelanto di nos tur.

Mirando e grandura i kompleksidat ku nos gobernashon ta konfrontando awor i den futuro, komo sindikalismo nos kier hasi un yamada na esnan konserní pa pone interes di e pueblo na promé lugá i si esei ta eksigí ku tin ku hala un banda, ke asi sea.

No tin espasio pa kapricho i orguyo falso awor aki. Awor ta ora di demonsstrá ku e boluntat t’ei i ku polítikonan ku kier ta lidernan real surpasá nan propio sombra, tuma responsabilidat, invertí den konfiansa mutuo pa asina nos komo isla por duna un kontesta real riba e pregunta kiko nos mes por i mehorá esaki i na unda nos mester di sosten i yudansa.

Den diálogo sentral sindikalismo i dunadónan di trabou a demonstrá durante 6 aña ku nos por a pone nos interesnan sektorial supordiná na interes general. Nos a duna e mihó ehèmpel di esaki den e Akuerdo di Kralendijk i riba diferente otro tereno.

Nos a subi kaya brasa ku brasa, skouder ku skouder pa lucha pa bienestar di esnan mas débil den nos komunidat i tambe pa oumentá e sueldo minimo. Nos a sirbi komo bon ehèmpel invertiendo den krea un base di konfiansa i bon ehèmpel ta kos di sigui.

Komo organisashonnan sosial, nos ta semper dispuesto si ta deseá pa duna nos aporte. I si pa dia 13 di ougùstes awor no por restablesé e koalishon aktual den un forma stabil, antó mester buska un base mas amplio polítikamente pa logra esaki.

Awor ta ora di demonstrá liderato i separa karné for di chubatu.

FUENTE: NÒCHI WILLEM/LIVE99FM