Redakshon
Kralendijk,- Resientemente e kampion den dragracing ku motosaikel,Fittipaldi Pietersz, di Fittipaldi Racing Bonaire, a splika muchanan di Kolegio Rayo di Solo i Strea Briante (Milepost 2 di IPC), kiko ta dragrace i su logronan.
E konosido drèkdó ku motosaikel riba islanan Aruba, Boneiru i Kòrsou, a splika e muchanan, rèspèt i disiplina ta importante, den tur loke ku bo ke ta eksitoso.
Promé instante yefrounan tabata poko preokupá, ku ta bai tin bochincha òf kisas fever na skol. Fittipaldi a splika nan, loke e ta hasi ta dragrace i bèrdat hopi hende na sa kiko e ta. El a splika e muchanan i e dosentenan: “Loke mi ta hasi i ta profeshonal den dje pa mas ku 28 aña, ta dragrace.
E por tin bochincha, pero no nesesariamente. Dragrace ta dos vehíkulo banda di otro i nan ta pusta, pa wak kua ta yega liña final promé, den un distansia di 400 meter.
Sigur e ta bai den mas detaye, pero básikamente ta pustamentu di outo, motosaikel, skuter asta trùk. Personalmente nunka mi a gusta bochincha.
Sigur loke mi ta hasi, esta dragrace, tin momentu e ta rekerí pa poko zonido, pa loke ta trata alkansamentu di velosidat den 400 meter. Mi ta komprondé yefrounan preokupashon i tambe hopi hende den komunidat, ku e asuntu di bochincha i fever.
Pero loke ami ta hasi ta otro for di fever òf drift. Mi konsentrashon i dedikashon ta den mundu di dragrace, esta pustamentu. Mi ta e promé Boneriano ku a sali kampion, pustando kontra koredornan di Kòrsou i Aruba bon eksperensiá, na 1997 Curaçao International Raceway.
Awor mi tin 9 trofeo di kampion i diferente otro mas ku mi a gana, tantu na Kòrsou, Aruba i Merka. Tur esaki sin un pista na Boneiru. Ta e úniko deporte na Boneiru, ku un persona tabata eksitoso asina hopi biaha, sin por trein riba su isla.
Ta importante pa kualke deporte ku bo ta hasi, tin disiplina. Esei tabata i ta mi éksito. Bo por tin e mihó ko’i kareda, meskos den otro rango di deporte, pero sin disiplina i rèspèt, e resultado ta pober. No solamente deporte, pero pa skol tambe, bo mester di disiplina pa pas’e ku éksito.
Mi ta masha kontentu ku mi a haña e oportunidat pa splika boso ken mi ta i kiko mi por nifiká pa boso i kòrda e kosnan importante ku mi a bisa, pa boso futuro ta eksitoso manera ami. Danki na yùfrou Melanie Pop i Jubella Balenin tambe e otronan i e muchanan.”
Mucha i yùfrounan a keda masha kontentu ku e splikashon i tur mucha por a pasa res e motosaikel di Fittipaldi, loke nan tabatin masha gana, sin a molestiá niun hende. Fittipaldi a hasi un demostrashon di salida na lus, kòrtiku. Tur kos, sin bochincha.
FUENTE: FITTIPALDI PIETERSZ/LIVE99FM
GIPHY App Key not set. Please check settings