NOS TA BIN BÈK RIBA E ASUNTU DI 6 PÈRMIT DI UN AÑA PA YENA 5 AÑA DI ESTADIA KONSEKUTIVO.  

Kralendijk,- Imigrashon tin un sistema straño pa kalkulá. Nan ta pretendé ku ‘sinku aña konsekutivo’ ta nifiká ‘mas ku sinku aña’. For di unda nan a bin ku e idea  aki, nos no sa. Nos tur sa ku 5 aña ta 5 aña. 

Laga nos splika un tiki mas detayá. Si un imigrante a biba 5 aña legal y konsekutivo na Boneiru sin problema ku hustisia, e por pidi un pèrmit di estadia permanente. Asina lei ta preskribí (art. 5.45 BtuBES). Pero den práktika, Imigrashon (IND) ta eksigí ku e imigrante mester pidi un di 6 pèrmit di un aña promé ku e por pidi su pèrmit permanente.

Pues somehow IND ta kere ku 5 ta igual na 6.

Nos a papia ku IND over di esaki dia 20 di febrüari 2025, pidiendo pa skrap e práktika no-nesesario aki. Pero te ainda IND no a tuma un desishon riba nos petishon.

Nos a mustra IND ku lei (art. 5.45 di BtuBES) ta bisa ku un imigrante ku tin 5 aña di estadia konsekutivo na Boneiru por haña un pèrmit permanente. E 5 aña, lei ta bisa, e imigrante mester tin sea riba e momentu ku e ta entrega e petishon pa e pèrmit permanente of riba e momentu ku IND te saka su desishon riba e petishon.

Por ehèmpel, si un imigrante ta entregá su petishon pa un pèrmit permanente, ban bisa, 2 luna promé ku su di 5 pèrmit di un aña ta kaduká, e ora ei e no tin 5 aña konsekutivo ainda. Pasobra na momentu di entrega e tin solamente 4 aña mas 10 luna. Pues pa lei e imigrante no por haña su pèrmit permanente ainda na e momentu ei. Sin embargo, tin un salida legal y simpel pa e problema aki.

Loke IND por hasi ta pa warda te ora e 5 aña a pasa y saka su desishon riba e fecha despues ku e 5 aña a kaduká.

Y esaki ta normal, pasobra IND kasi nunka no ta saka su desishon dentro di 2 luna.

Pues tin un solushon legal y simpel pa evitá ku e imigrante mester saka un di 6 pèrmit promé ku e por pidi su pèrmit permanente. Lástimamente IND te ainda no a kumpli ku nos petishon pa apliká lei na e forma simpel y legal aki.

Te ainda IND ta sigui eksigí ku e imigrante mester pidi un di 6 pèrmit promé pa despues e por entregá su petishon pa un pèrmit permanente. Esaki ta forsa e  imigrante pa saka mas sèn y e ta pèrdè mas tempu. Pero ántes, a base di mesun lei, IND no tabata eksigí esaki.

Klaramente esaki ta un maneho ku ta perhudiká imigrantenan SIN TIN NODI.

IND a bisa ku mester pidi Hulanda pèrmit pa kambia e maneho anti-imigrante aki. Na nos pareser esei ta un argumento non-sensiko, pasobra nos no ta pidi nada kontra di lei. Djis un servisio mas humano pa ku e imigrante.

Esaki ta djis un di e tantísimo abuzunan ku imigrantenan tin ku sufri. Sin tin nodi. Gobièrnu tin ku trata hende ku rèspèt y humananente. Y imigrantenan meresé mesun trato.

Tur djasabra Fundashon ‘Union di Imigrantenan Boneriano’ (FUIB) tin un konsultoro hurídiko grátis di 4’or te 6’or di atardi na Ofisina di Abog. Bijkerk na Antriol. Adrès: Kaya Jose G. Hernandez 16A.
Por yama o whatsapp abog. Bijkerk na 796 2650.

FUENTE: FUIB /ABOG. M. BIJKERK