FAITH ALONZO MOSQUEA I KEI’ANNA NIEUWKERK LO REPRESENTÁ BONEIRU DEN MINI I PRETEEN CHARM INTERNATIONAL NA BARRANQUILLA, COLOMBIA – YÜLI 2025

Kralendijk,- Fundashon BIATA, bou di liderato di su direktor Johnrick Anthony, orguyosamente ta anunsiá ku Faith Alonzo Mosquea i Kei’anna Nieuwkerk lo representá Boneiru na e prestisioso sertamen Charm International 2025, ku lo tuma lugá na Barranquilla, Colombia, entre e dia 21 te 26 di yüli 2025.

            •          Faith Alonzo Mosquea lo representá Boneiru den Mini Charm International.

            •          Kei’anna Nieuwkerk lo representá Boneiru den Miss Preteen Charm International.

Mini Charm International i Preteen Charm International ta sertamennan internashonal dediká na mucha muhé entre 4 te 13 aña, ku su meta prinsipal ta promové beyesa, balornan, intelekto i komportashon, mientras ku ta duna enfoke spesial riba interkambio di kultura i eksposishon turistiko di kada pais ku ta partisipá.

Mishon di e sertamen ta pa krea un plataforma inklusivo i formativo, kaminda mucha muhé por desaroyá su karakter, gana eksperensia i fortalesé su kapasidat personal i profeshonal. E sertamen ta buska reskatá balornan sosial i duna e partisipantenan un oportunidat pa siña, krese i bria den un ambiente di rèspèt i diversidat.

E vishon ta pa bira un di e sertamennan mas influyente i respetá na nivel mundial, promové integridat, liderazgo i empoderashon di kada partisipante. Asina, e mucha muhénan lo keda inspirá pa bira lider positivo den su komunidat i kontribuí na e promoshon di nos kultura i turismo.

Fundashon BIATA aktualmente tin e preparashon di Faith Alonzo Mosquea i Kei’anna Nieuwkerk bou di su enkargo. Durante dos luna tras di lomba ya tabatin entrenamentu intensivo; nan a pasa den diferente aktividat formativo manera lèsnan di pasarela, workshop pa amplia nan konosementu general i seshonan di fotografía pa ekspreshon i imágen públiko.

Durante e siman di e sertamen, Faith i Kei’anna lo partisipá den varios di aktividatnan di promoshon, interkambio kultural i representashon di Boneiru dilanti di un públiko internashonal. Nos ta konfiá ku nan preparashon i dedikashon lo reflehá bèk positivamente riba nos isla.

Pueblo di Boneiru, instansianan públiko i priva ku ta deseá pone nan konfiansa i sosten den e bista i soño di e hóbensitanan Boneriano aki,

por tuma kontakto ku nos via +599 7876240 of biata.foundation@gmail.com.

Nos ta konta ku bo apoyo i bo sosten pa pone Boneiru su nòmber riba mapa internashonal

FUENTE: FUNDASHON BIATA/LIVE99FM