PUEBLO MESTER FOCUS RIBA STABILIDAT DEN GOBERNASHON. E KUALISHONNAN KU A GOBERNA DESPUES DI 10-10-10 NO A FABORESÉ E ISLA DI BONEIRU MANERA E PUEBLO A DESEA.

Kralendijk — Desde e kambio históriko di 10 di òktober 2010 (10-10-10), Boneiru a pasa den un seri di instabilidad polítiko ku no a faboresé e desaroyo di e isla manera e pueblo votado a desea.

E kualishonnan ku a drenta i sali for di gobièrnu den e último añanan a demostrá ku e outonomía i fòrsa pa negoshá ku Hulanda a keda debilitá, lagando e siudadano boneriano den un situashon di insertidumbre.

Mirando e próksimo elekshon 2027 i e formashon di un gobièrnu nobo, nos yamada na e pueblo votadó lo ta fuerte i kla, Pueblo mester focus riba duna un mandato fuerte i transparente na un solo partido pa garantisá stabilidat i evitá ku desaroyo di Boneiru ta wordu stanka pa motibu di kualishonnan instabil.

E eksperiensia despues di 10-10-10 a siña nos ku kualishonnan fràgil i fragmentá hopi biaha ta hiba na instabilidad politiko ku ta stanka desaroyo futuro di Boneiru.

Kada bes ku un gobièrnu kai òf kambia di fòrma, e plannan di desaroyo ekonómiko, sosial i di infrahstruktura ta sufri un paralisashon.

E asina yamá “islanan BES” a keda dependé hopi biaha riba desishonnan for di Den Haag, netamente pasobra e liderasgo lokal tabata strukturalmente dividí i sin un base stabil pa por para firme serka e Hulandesnan Eropeo pa negosha interesnan di Boneiru.

Si nos ke pa Boneiru progresá, nos no por kontinuá riba e mesun kaminda di kualishonnan di kombineshon ku ta faya fásilmente. Pa e próksimo gobernashon, e pueblo mester tuma e stür i focus su voto stratégikamente den un direkshon.

Duna mandato na un solo partido ku un vishon koherente ta e úniko garantia pa un gobièrnu stabil. Stabilidat den gobièrnu ta nifiká kontinuidad di maneho, stabilidat pa invertidónan, i e fòrsa nesesario pa defendé e derechonan i e bienestar di e pueblo boneriano sin wordu frena.

Pueblo mester kompronde ku e proksimo elekshon na 2027, no ta tempu pa partimentu di voto ku ta hiba na mas instabilidad i divishon den gobernashon di boneiru.

Ta tempu pa un mandato direkto i husto, kaminda e partido ku goberná por keda tené responsabel pa su resultadonan, i kaminda e desaroyo di e isla no ta keda stanká pa motibu di interesnan personal òf partidario.

Pueblo di Boneiru, e futuro ta den bo man, vota pa un partido ku e ultimo tempunan A I ta demostra stabilidad, vota pa progreso kontinuo, vota pa un vishon ku ta duna oportunidadnan duradero.

FUENTE: RENNY WINKLAAR