BOPEC FOR DI PERSPEKTIVA SINDIKAL

Kralendijk,- Mi a tuma nota di un intento dirigí pa pone sindikalsmo den un mal lus relashoná ku  e susesonan tristu di un siere obligatorio di BOPEC pa motibu di a drenta den un estado di no por a kumpli mas ku su obligashonnan finansiero i komo tal a keda deklará pa Korte di Hustisia Bankarota.

E intenshon di e komunikado aki no ta pa sali na defensa di sindikalismo ni tampoko pa bai hiba un diskushon insensato ku e protagonisadó di plamamentu di un notisia totalmente inkorekto pa falta di konosementu di nos leinan lokal. Loke si ta e intenshon ta pa kontradesi ku echos un aktitut peligroso di dividí, antagonisá, krea rabia, den un palabra un intenshon pa destrui.

Problemanan fundamental na BOPEC

Despues di un kandela feros na BOPEC na 2010 supervishon i mantenshon di nos leinan di seguridat a bai kai bou di un ministerio di Ulanda, ehekutá pa  e departamentu di ILT. Un inspekshon di e departamentu aki na Bopec a konstatá.

1. Un mal estado di años di falta di mantenshon na e planta di transborde di produktonan petrolero tantu na e pirnan e pipanan komo na e tankinan.
2. Un peliger real pa medio-ambiente pero tambe pa e personal di e planta.

Banda di esaki, BOPEC komo un kompania pertensiendo na PDVSA, kual na su turno ta un kompania propiedat di estado di Venezuela a konfrontá ku medidanan sumamente severo di parti di Merka, apoyá i sekundá pa Union Europeo, di kual Ulanda ta forma parti integral. Esaki a trese kuné ku a para tur tráfiko pa trese i saka produktonan petrolero for di BOPEC, pero tambe a blòkia tur fondonan ku mester a yega na disposishon di e kompania. Tabata opvio ku e medidanan aki riba término largu lo a nifiká irreversiblemente sangramentu finansiero di e kompania i ku lo hiba e kompania na kiebro, esta na bankarota. E situashon aki ku a kuminsá na 2010 a sobreviví te ku aña 2021, kaminda a ora sero a yega i ku no a keda otro remedio si no di a deklará BOPEC bankarota.

Ròl di sindikato

E ròl di sindikato ku den promé instansia tabata kargá pa BPWU den representashon di e trahadónan, despues Fedebon den representashon di e personal di staf sostené i konsehá pa USIBO, kual ta e organisashon madre sindikal na Boneiru a uni forsa ku un meta salbaguardiá e interesnan di e trahadónan. Primeramente miéntras ku tabatin sufisiente solvabilidat di e kompania e interesnan aki tabata ankrá den un CAO i e sindikatonan a para riba kumplimentu kabal di e kondishonnan aki. Di parti di BOPEC esaki a keda suprayá i BOPEC a kumpli tambe apesar di e situashon difisil i ku dia tras dia tabata empeorá.

Tur esfuerso di tur partido enbolbí esta gerensia di BOPEC, representantenan di PDVSA, sindikatonan BPWU, Fedebon i USIBO pero tambe gobièrnu lokal pa tene BOPEC habrí esta di suavisá e medidanan i a lo ménos pèrmití pa fondonan por a yega Boneiru pa por a sigui operá e planta a bin noufragá riba posishon intransigente di esnan ku a tuma e medidanan, esta Estados Unidos, Union Oropeo inkluso Ulanda. Sindikato hasta a usa menasa di wèlga i tambe a tene un manifestashon grandi di trahadónan, eks trahadónan i nan famia i ku apelashon riba komunidat pa sosten a entregá un petishon formal na gezaghèber pa hasi tur loke ta na nos alkanse pa tene BOPEC habrí i ku esei salbaguardiá pan di un kantidat di trahadó i nan famia.

Bankarota i su konsekuensia

A yega e momento inevitabel, esta ku BOPEC a bira insolvabel, pues no por a kumpli ku su obligashonnan finansiero, inkluso kondishonnan finansiero laboral, ku e desishon den Korte a kai ku ta deklará BOPEC bankarota. Na e momento ei ta lei di bankarota BES ta drenta na vigor i henter e proseso di bankarota ku tur su konsekuensianan ta bai bou di un “curator” supervisá pa un hues komisario apuntá dor di Korte di Hustisia. Un di e konsekuensianan ta ku e “curator” ta terminá tur kontrato di labor usando naturalmente e tempu di antisipashon(opzegtermijn) ku lei ta preskribí. I despues di analisá i pone bon kla tur esnan ku BOPEC debe i esnan ku debe BOPEC i analisá e balor di e propiedat tantu pa loke ta e e parti físiko(tanki, kasnan i otro propiedat) pero tambe e loke ta movibel(produktonan petrolero den e tankinan) lei ta duna e outroridat pa bende na findishi i e loke risibí di akuerdo ku un sekuensia ku lei ta preskribí repartí e fondonan bou di esnan ku BOPEC debe, entre  kual debe na e trahadónan. I den esaki sindikato no tin ningun envolvimentu ni partisipashon.

Kiko si sindikato a hasi

For di e momento ku e bira bisto ku tabatin e menasa ku BOPEC lo yega na un punto di no tin fondonan finansiero mas pa paga su obligashonnan, entre kual e kondishonnan finansiero laboral di e trahadónan e sindikatonan uní, esta BPWU, FEDEBON ku asistensia intensivo di USIBO a tuma e siguiente pasonan.

1. Perkurá pa kompensashon di retiro e asina yamá areglo di sesantia, kual ta un kompensashon basá riba e kantidat di añanan di servisio. E areglo aki ta regá den lei i ta enserá.
2. 1 siman di salario pa kada siman den e promé 10 añanan di servisio.
3. 1 ¼ siman pa kada aña di servisio di 11 pa 20 aña di servisio
4. 2 siman pa kada aña di servisio riba 20 aña di servisio.
5. Sindikatonan a hasi un esfuerso serio serka ministerio di Labor pa a usa e mesun areglo di tempu di Covid, esta sigui paga 80% di e salario di e trahadónan di BOPEC pa un tempu definí ku e speransa ku òf ta re-anudá operashon di BOPEC bou di otro doño òf ta krea espasio pa e trahadó por buska otro trabou.
6. Mesora den Diálogo Sentral a bin ku e punto pa entrodusí legalmente na Boneiru un “werkloosheidsuitkering”, un kompensashon di desempleo, ora ku e trahadó pèrdè su trabou fuera di su boluntat. Esaki lo ta pa 6 luna pagando e trahadó 70% di su último salario.
7. I nos a yega na akuerdo ku Entidat Públiko pa yudansa temporal pa e trahadónan por paga nan hür di kas, hipoteka, resibu koriente i awa i kuminda.
8. Via plenchi di trabou intermediá den buskeda di otro trabou digno pa e trahadónan.
9. Riba base personal konsehero di USIBO a pone kontakto ku un kompania grandi na Ulanda i a krea e posibilidat pa esnan ku tabata deseá esaki por a tuma kontakto ku e kompania pa wak si por a yega na un akuerdo.

Ku e relato kòrtiku aki mi kier a pone e kaso di BOPEC den perspektiva sindikal i pa e ta dokumentá pa historia sindikal na Boneiru. Komunidat boneriano, mundo kompleto pero mui en partikular e trahadónan di BOPEC tin derecho di sa e echosnan sunú manera nan ta i pa kada ken husga pa nan mes i no pa otronan ku no tabata ni seka di e lucha aki ku informashonnan inkorekto venená mente i kurason di hende.

FUENTE: NORWIN WILLEM/LIVE99FM