ENTRE 2010 TE KU PROMÉ DI YANÜARI 2025, E POBLASHON DI BONEIRU A SUBI KU NO MÉNOS KU 69%.

Kralendijk,- Un komunidat ku tabata konta ku ménos ku 16.000 hende, tin awor 26.552 habitante. Pero mientras ku e sifra ta sigui subi, mentalidat i kultura di gobernashon a keda pegá den tempu.

E realidat ta ku nos isla a krese, pero nos gobernansa, nos servisio públiko i nos liderato a keda pegá den tempu i no tin un lugá mas den e Boneiru di awe.

Tuma por ehèmpel WEB N.V. E kompania ta invitá komunidat pa yena un enkuesta tokante nan servisionan.

Bon inisiativa riba su mes. Pero den práktika esaki ta un otro historia. Na Kaminda Yato Bako, tin un tap di awa kaminda awa ta kore subi e kaminda di tera ora ta hasi uzo di esaki. Truknan grandi ta pasa tur dia i hasi e estado di kaminda un desaster kompletu.

Hendenan via di korant a pidi pa remediá e situashon pero nada. Un solushon hopi barata ta pa pa drecha e drenahe di tal forma ku e no ta subi kaminda mas. Simannan a pasa pero nada no ta pasa. Silensio. Ta via di enkuesta so kisas WEB lo tuma nota di e problema aki?

Tuma e lusnan den Kaya Aurora. Residentenan pa medio di korant a pidi WEB pa bin drecha e lusnan di e kaya ei ku tin mas ku un aña ku nan no ta traha. Simannan ta pasa i ni un reakshon di parti di WEB.

Aparentemente no tin ningun hende na e kompania aki ku ta lesa korant i asina keda den kontakto ku e pueblo. E tipo di tardansa aki no ta pas mas den un tempu ku e isla ta aden awor i esaki ta kompletamente inaseptabel.

Curoil tambe ta un di e entidatnan ku ta kontribuí na e frustashon den e pueblo. Mas ku dies aña pasá, a firma un akuerdo ku Boneiru lo haña su mes stashon pa yena gas. Te aworaki, nada.

Segun un informe di AD di djasabra último 250 kas na Kòrsou i 350 kas na Boneiru ta warda riba un bòter di gas di 100 lbs. Pa Kòrsou esaki ta 1.63 kas riba kada 1000 habitante i pa Boneiru no menos ku 13.18 kas riba kada 1000 habitante. E diferensia aki ta enorme i ta mustra riba un  problema struktural i logístiko serka Curoil na Boneiru.

Den un tempu di awe esaki no ta normal i hopi preokupante, spesialmente konsiderando e dependensia di kasnan i establesimentunan di horeca riba e suministro di gas aki. Un èhèmpel klave ku e kompania no ta move ku tempu i nan ínteres ta na Kòrsou i no na Boneiru. Tur desishon di importansia ta Kòrsou ta tuma esaki. Na Arùba, Arugas ta duna servisio moderno, tanki di tur sorto di tamaño pa hotel, restourant i snèk ku ta keda instalá i yená pa un truk speshal. Si Curoil no ke sigui ku tempu, Boneiru mester buska un aliansa ku Arugas.

Pero e problema no ta solamente ku WEB òf Curoil. E apatia tambe ta manifestando su mes serka e gobièrno.E akuerdo di gobernashon ku Hulanda kasimente no ta keda ehekutá. E lentfel na Lagún ta un desaster ambiental i e sekretario di estado a haña su mes purá ta bin Boneiru  pa prevení un desaster mas grandi, mal gobernashon i mas rabia di habitantenan.

Pero entre tur esakinan, un brisa di speransa a supla den sala di konseho insular siman pasá. Despues di tempunan largu sin direkshon, kaminda solamente tin tempu pa likidá bos di e  plataforma Boneiru Nobo i mas Outónomo, un politiko hóben di MPB, sr. Hennyson Thielman ku a mustra ku e tambe kier un Boneiru nobo,  a presentá un moshon, briantemente hinká den otro ku klaridat, urgensia i timing stratégiko, i no a keda konseho insular nada otro pa voto  unánimemente na fabor di esaki.

E moshon ta trata e kriminalidat riba Boneiru ku ta bira mas preokupante tur dia. Atrakonan, ladronisia i insidentenan ku arma di kandela ta oumentando drástikamente. Hóbennan ta inbolbí mas i mas den tur esaki i komunidat di Boneiru ta sinti su mes insigur i tur hende ta bisa: ta basta awor.

Thielman su moshon ta pidi pa akshon inmediato. No mas estudio, no mas delegashon pa biaha bai Hulanda òf Isla Riba. E ta pidi formashon di un grupo di trabou interdepartamental bou di liderato di e gezaghèber, ku polis, skolnan, instansianan di kuido, reklassering i un organisashon di hóbenan pa tambe ta na mesa.

E liderato mester ta bou di gezaghèber pasobra bou di e kolegio aktual bo por ta sigur ku nada lo no sosodé. E grupo lo mester identifiká e problemanan, duna informashon i traha riba un plan konkreto pa prevenshon i resultado real. Esaki ta goberná.

FUENTE: WILLEM CECILIA