PLATAFORMA BONEIRU NOBO I MAS OUTÓNOMO (PBNO): RIBA UN KAMINDA HUSTU PA OUTODETERMINASHON, NO PA REPITISHON DI TRAMPANAN BIEU.

Kralendijk,- Plataforma Boneiru Nobo i Mas Outónomo (PBNO) a tuma nota di e komunikado resien di PPU fechá 22 di mei 2025, i manera nan mes ta bisa tambe di nan líder máksimo sr. James Finies.

PBNO ta ripudía ku firmeza total e insinuashonnan resiente di PPU i su lider máksimo ku ta pinta su mes manera e “Don Quijote di Boneiru”.

E Atakenan aki no solamente ta infundá, pero tambe ta mustra un intento klaru pa sabotiá tur diálogo serio tokante futuro di Boneiru.

Laga nos papia kla: PBNO no tin mester di hende pa skibi nos dokumentonan ni pa hasi nos anális. Nos mes, ku kapasidat lokal i konosementu internashonal, ta traha nos vishon. Atakenan kontra e kapasidat intelektual di Bonerianonan ta reflehá presís e mentalidat kolonial ku nos ta lucha kontra dje.

E mesun “Don Quijote” aki ku ta sigui insistí ku e referéndum di 2015 tabata legítimo, mester probá ku e referéndum ei a kumplí ku tur standart internashonal ku ta stipulá pa NASHONAN UNI i otro entidat relevante. Si e no por hasi esei, e no tin ningún base pa sigui ripití ku e referéndum tabata bálido.

PPU i su lider of lidernan ta hasi tur loke ta posibel pa pinta Boneiru malu pa Nashonnan Uní disidí di pone Boneiru riba lista di teritorionan sin propio gobernashon. Nan ta lubidá ku NASHONNAN UNÍ no tin base pa pone Boneiru riba e lista aki pasobra Boneiru no ta kai mas bou di gobernashon kolonial, Boneiru ta parti di un estado soberano ku ta Hulanda i Boneiru tin su propio goberanshon pa medio di e proseso demokrátiko hulandes. Ku tur kos ta bon, klaro ku nò.

Nos di PBNO ta para firme pa un transishon institushonal: un proseso konsiente i gradual pa kambia e struktura i relashon di poder — pa sali for di un sistema di dominashon kolonial, i move riba un fundeshi di kolaborashon igual. Pa ku esei nos a traha un plan pa den fase yega na un referéndum internashonalmente rekonosé na aña 2035, ku lo satisfasé tur esigensia di e sistema internashonal legal, inkluso NASHONNAN UNÍ.

Nos apelashon ta kla: Pa tur hende pone man na obra pa identifká un futuro mas hustu i outónomo. Nos SI no ta hinka energia den ataká hende ku ta pone kurason i mente pa sirbi e pueblo boneriano. Pero nos lo respondé ku firmeza, rápido i total riba tipo di atakenan di PPU i su Don Quijote di Boneiru ku ta reflehá netamente e mentalidat i kultura ku nos ta lucha kontra dje i ta hasi daño na Boneiru foral riba e plataforma internashonal.

PPU i su Don Quijote a nota den nan komunikado ku pueblo tin e derecho pa kuestioná akshon- i desishonnan públiko di politikonan i figuranan públiko den posishon di liderazgo. Esei ta netamente loke PBNO ta hasi pasobra e askhonnan di PPU i su lider of lidernan ta pone Boneiru den un mal lus internashonalmente kontantemente i nan ta lastra hendenan lokal ku ta bisa kosnan ku no ta pas den nan kaya.

Nos lo sigui defende e derechonan di pueblo Boneriano pa skohe su futuro — ku dignidat, ku igualdat i ku garantia internashonal.

Na nòmber di: Plataforma Boneiru Nobo i Mas Outónomo

FUENTE: WILLEM A. CECILIA