MI TA KONTENTU KU SENDION TA BAI CABOVERDE PA SIÑA MAS DI SKLABITUT.

Kralendijk,-Mi ta spera ku e biahe ta bon prepará i organisá ku organisashonnan na Caboverde, pa evitá ku e mishon tan bunita aki bira algu purá purá.

Lo ta bon pa tin e kontakto ku diferente historiadó, sosiólogo I biblioteka di e islanan. Un mishon di dies dia sin un organisashon fuerte ku un bon pregunta investigativo por bira difísil. Mas mihó ta un estadia di dos siman ku mas persona manera  Wesly Sint Jago, George Thodé, Tiri trinidad, Xenha Cicilia I Albert Crestian huntu ku Kjeld Kroon pa hasi investigashon pa sa e similaridatnan ku Bonaire. Ta personanan ku ta bini di Rincon konosí komo slavendorp.

Asta tin un lugá na Caboverde ku e nòmber Rincao ta zona manera Rincon. Mi ta skirbi di mi eksperensia di dies dia na dos di e dies islanan ku ta Sal i kapital Praia riba e isla Santiago. Por hasi e biahe un proyekto finansiá ku fondo pa proyektonan relashoná ku sklabitut. Ta importante pa sa ku krioyo di Caboverde no ta Papiamentu i bo no ta yega leu ku Papiamentu.

Pues lubidá e storia ei ku ta zona bunita. Ku imigrantenan komersial di Senegal sí bo ta yega leu ku papiamentu.  Tin monumento, museo, biblioteka, universidat ku un kantidat di dokumentu, pòrtrèt, pintura. Ku bon guia bo tin akseso na radio i televishon pa trese bo den kontakto ku gruponan kultural. Ta bon pa regalá kantikanan folklóriko di Bonaire i buki pa mucha na Papiamentu.

Tin un CD di Pal’i Wiri, opsekio di Ubaldo Anthony, ku mi a regalá un emisora. Un bishita na merkado ta trese bo den Bonaire. Mi ta spera ku e kontakto ku Caboverde lo bira unu duradero ku kontaktonan riba nivel históriko, folklóriko i kultural

FUENTE: ARTRHUR SEALY/LIVE99FM