SOS: YUDA SALBA BONEIRU: UN YAMADA URGENTE NA E KOMUNIDAT INTERNASHONAL

Kralendijk,- Fundashon Bonaire Human Rights Organization (BHRO) ta hasi un yamada urgente di SOS na e komunidat internashonal. Boneiru ta enfrentando un krísis silensioso humanitario i demográfiko ku ta menasá e sobrevivensia na largu plaso di e pueblo originario boneriano.

Na 2004, Ramonsito Booi di UPB, e partido polítiko prinsipal di Boneiru, huntu ku Burney Elhage, Arthur Sealy, James Kroon, Jopie Abraham i otro lidernan polítiko, tabata entre e prinsipal arkitektonan i personanan responsabel pa e proseso konstitushonal ku a desmantelá Antias Hulandes, i a degradá Boneiru, sin e konsentimentu di su pueblo, na un estatus konstitushonal nobo i subordiná komo “entidat públiko”, atministrá i goberná for di Den Haag. Na e momentu ey, Boneiru tabatin un poblashon di aproksimadamente 10.008 hende, ku mayormente tabata bonerianonan nativo.

Na 2017,  Clark Abraham di Partido Demokrátiko (DP),huntu ku MPB, Elvis Sjin Asjoe i Daisy Coffie, a aprobá den Konseho Insular pa Hulanda ankrá Boneiru den Konstitushon Hulandes, sin e boluntat liberamente ekspresá di e pueblo.

Na 1 di yanüari 2026, poblashon di Boneiru tabata 27.611 habitante, ku e kresementu resiente di e poblashon impulsá ku gran mayoria pa inmigrashon. Den 2025 Boneiru a registrá solamente 252 nasementu, 170 morto i 2.116 inmigrante, demostrando ku inmigrashon, i no kresementu natural di e poblashon, ta e prinsipal motor di e oumento poblashonal riba e isla.

E sifranan aki ta bin for di Centraal Bureau voor de Statistiek (CBS), e outoridat nashonal independiente di statistiko di Hulanda, responsabel pa kolektá, analisá i publiká e sifranan ofisial demográfiko, sosial i ekonómiko di e pais.

Segun e pronóstiko ofisial di poblashon pa Karibe Hulandes (2025–2050) di CBS, poblashon di Boneiru lo sigui krese for di 26.600 na 2025 te na aproksimadamente 34.200 den 2035.

CBS tambe ta proyektá ku e porsentahe di habitantenan nasé na Boneiru lo sigui baha, pasobra inmigrashon lo sigui ta e prinsipal fuente di kresementu di poblashon.

Segun e proyekshonnan demográfiko ofisial aki, si e tendensianan aktual ta kontinuá, bonerianonan nativo por bira ménos ku 15% di e poblashon di Boneiru den e próximo dies aña, transformando e pueblo originario den un minoria chikitu den nan mes tera natal.

Tin tambe hopi otro faktornan institushonal ku ta kontribuí na e desestabilisashon I eliminashon demográfiko i kultural aki, manera e bahada di tasa di nasementu entre bonerianonan nativo, oumento di mortalidat, i e situashon ekonómiko ku a bira mas difísil despues di e kambionan konstitushonal di 10 di òktober 2010.

Ademas, e oumento di belasting riba tereno, impuesto riba propiedat, e subida enorme di preis di kasnan, e aumento di kosto di bida i e preshon finansiero kresiente a obligá hopi bonerianonan nativo pa bende nan terenonan ansestral, kas di famia i negoshinan lokal, òf pa laga bandona Boneiru kompletamente I bai buska oportunidatnan mas aksesibel na otro pais.

Tur e preshonnan aki kombina I huntu ku e kontinuo inmigrashon, ta aselerando e eroshon demográfiko i kultural di e pueblo originario boneriano.

BHRO p’esei ta hasi un yamada urgente di SOS na CARICOM, COPPPAL, e Organization of Eastern Caribbean States (OECS), e Organization of American States (OAS), Nashonnan Uní , e Konseho di Derechonan Humano di Nashonnan Uní, gobièrnunan den henter Karibe i Amérika Latíno, organisashonnan internashonal di derechonan humano, sosiedat sivil i tur hende di bon boluntat, pa eksaminá ku urgensia e situashon na Boneiru i tuma akshonnan apropiá pa yuda protehá e derechonan humano fundamental, identidat, kultura, idioma, herensia i futuro di e pueblo originario boneriano promé ku e krísis humanitario silensioso aki bira irreversibel.

FUENTE: BONAIRE HUMAN RIGHTS ORGANIZATION