UN DI E PILARNAN FUERTE DEN NOS KOMUNIDAT PA GARANTISÁ UN FUNSHONAMENTU DEMOKRÁTIKO DEN NOS ESTADO DI DERECHO TA PRENSA LIBER.

Kralendijk,- Prensa no t’ei solamente pa eduká i informá komunidat ku notisia i temanan di interes sosial-kultural.

Pensa liber t’ei komo un di e “watchdog”nan masha importante pa sigurá ku nos demokrasia ta sigui funshoná basá riba poder kontrolá i enkuadrá DEN nos konstitushon i leinan di pais.

Prensa mester vigilá i bati alarma mesora ora ku polítikonan ku mandato di poder di votadónan krusa e liña di poder den un forma ilimitá i sigur pa no tolerá ni pèrmití pa ningun persona sigur esunnan ku no tin legitimashon elektoral demokrátiko outoproklamá nan mes komo lider di pais.

Un otro tarea importantísimo di Prensa ta pa no tolerá korupshon gubernamental. Hasi uso di su poder investigativo ta duna Prensa e mandato pa informá komunidat violashon di prinsipionan di bon gobenashon i denunsiá korupshon públikamente.

Ekspreshonnan manera nos no por sigui regla i prosedura tur ora ta parse simpátiko pasobra e ta faboresé un persona, un amigu, un famia òf un grupo di interes, pero e ta planta e simia pa un gobernante kere ku e tin poder pa hasi i deshasi ku e funshon ku e ta okupá.

Nos demokrasia mester elevá su mes na tal nivel ku no ta komunidat mester tin miedo di gobernashon, pero ku gobernashon ta respetá komunidat.

I den esaki esnan ku ta traha den prensa, sea korant, radio o televishon – mester uni nan mes pa nan por hasi nan trabou independientemente i mas ophetivamente posibel. Pa hasi esaki e trahadónan den prensa mester organisá nan mes.

Organisá nan mes meskos ku trahadónan den otro sektor den nos komunidat ta organisá. E organisashon por ta sea un organisashon di interes di periodistanan i/o un sindikato di periodistanan.

Ku un organisashon asina, tantu lokal, komo riba nivel nashonal(Hulanda), pero tambe riba nivel internashonal (Caribe, Oropa i Nashonan Uni) tin fondonan disponibel pa e periodista por eduká i forma su mes mas profeshonal i ku esei mas independiente di supsidio i/o plakanan komersial i di gobièrnu ku hopi biaha ta mará na interesnan komersial i/o polítiko partidista.

No kritikami òf hasi loke mita mandabo sino mi no ta dunabo aviso, esei ta tipifiká e prensa no independiente. Fondonan ku por hasi posibel ku nos ta krea periodismo investigativo.

Investigashon periodistiko no solamente ta kosta tempu pero tambe sèn pa por yega na e dokumentashonnan nesesario. Fondonan tambe disponibel pa duna asistensia hurídiko ora e periodista hañele konfrontá ku podernan finansiero ku kier silensiá prensa liber dor di terminá relashon di trabou.

Pero tambe risibí protekshon ora tin aspektonan manera menasa òf trata na kumpra periodistanan a kosto di nan silensio den sierto kasonan.

Pues sufisiente motibu pa trahadónan den Prensa aki na Boneiru konsiderá seriamente pa nan organisá nan  mes. I kòrda organisá boso mes ta un derecho konstitushonal ku boso tin i ku no mester duna kuenta i rason na ningun hende i/o instansia.

E mensahe pa e siman aki ta: E relashon entre Sindikalismo i Prensa Liber ta ku sin  sindikalismo hopi trahadó lo no tin bos; sin prensa liber e impakto kolektivo di e bos aki lo keda limitá. Huntu sindikalismo ku prensa liber ta e garantia pa un funshonamentu demokrátiko di Boneiru.

FUENTE: NORWIN NÒCHI WILLEM