Redakshon
Kralendijk,- Mayoria di sindikatonan na Boneiru ta na mesa di preparashon pa un selebrashon konhuntu di Dia di Labor 2025. Ku e informe aki, trahadónan di Boneiru por ta sigurá ku 1 di mei 2025 lo tin selebrashon di Dia di Labor.
Awor ta na kada trahadó i su famia pa duna realse na e Dia di Labor aki i ta presente na e aktividatnan ku lo keda organisá riba e dia aki.
Pakiko selebrá Dia di Labor ku hasta pa lei a keda nominá komo un dia ofishal di fiesta huntu ku e 11 otro dianan nashonal di fiesta ku un dia liber pagá. I esnan ku traha riba e dia ei lo risibí un kompensashon èkstra riba nan salario normal pa dia.
” Tur trabou ku ta alsa kalidat di humanidat ta digno.” I si awe e klase trahadó ta gosa di benefisionan sosial ekonómiko ta konsekuensia di logronan di luchanan di lidernan sindikal ku vishon i ku den un forma determiná a lanta para i kibra ku e kadena di miedo.
Traha 8 ora pa dia ta logro di lucha sindikal basá riba e vishon ku mester tin un balansa den e bida diario di e trahadó. E vishon tabata ku un hende mester traha 8 ora, sosegá 8 ora i tin 8 ora pa hiba un bida sosial sea ku su famia òf ku otronan ku ta biba i traha den un komunidat. Ku awe tur trahadó pa lei mester tin minimal 15 dia di vakashon pa aña no a kai for di shelu.
Ku trahadó tin protekshon kontra retiro sin motivashon ta danki na e lucha sindikal. Ku a bira posibel pa trahadónan atraves di nan sindikato por firma kontraktonan laboral kolektivo ku ta brinda protekshon i ta garantisá igualdat riba flur di trabou ta logronan históriko ku ta forma e fundeshi tras di slebrashon di Dia di Labor internashonalmente.
Trahadónan den komunidat boneriano mester realisá i alabes mester ta orguyoso ku serka nos tin rekonosementu legal di klase trahadó komo partner igual den e desaroyo sosial-ekonómiko di Boneiru. I no balotá boso forsa. E rekonosimentu aki a bira posibel danki na esfuersonan inkansabel di boluntarionan ku ta sakrifiká nan tempu, nan salú, nan bida familiar pa traha ku determinashon na kuida i konservá derechonan i kondishonnan laboral atkerí atraves di años pero alabes ta sigui pa mehorá e kondishonnan laboral di e klase trahadó i su famia.
I pa tur dia di nobo alimentá e trabounan aki na bienestar di e trahadó i su famia ta rekerí ku un biaha pa aña den un forma ofishal nos ta bin huntu i selebrá e logronan sosial ekonómiko aki i e dia ta 1 di mei Dia di Labor. Dia di Rincon su éksito ta e binimentu huntu di pueblo pa selebrá nos herensia kultural históriko dia 30 di aprel
E binimentu huntu masalmente di e pueblo ta tambe e satisfakshon di e organisadónan di e Dia di Rincon ku ta eksperenshá e apresio i rekonosimentu di pueblo pa nan trabou. Asina partisipashon masal di trahadónan i nan famia riba 1 di mei lo ta e satisfakshon pa lidernan sindikal ku e klase trahadó ta apresiá i rekonosé nan trabou diario i e logronan ku esaki a trese kuné pa tur, mi ta ripití pa tur trahadó sea bo ta miembro òf no di un sindikato. I pa esnan ku no ta miembro ainda, mi ta spera ku e selebrashon di Dia di Labor por lanta den nan e kandela di solidaridat, e kandela di union i ku nan tambe ta bin forma parti di e famia grandi sindikal boneriano.
Ta boso komo trahadó por tene e kandela di e lucha sindikal sendé i ta ku boso partisipashon, nos por kontinuá i sigui realisá e tres prinsipionan sindikal esta Rèspèt, Rekonosimentu i Rekompensa hustu pa trabou ehersé.
“Promé ku e rekompensa tin trabou. Nos ta planta promé nos kosechá.” Planta e simia aki di e importansia pa konmemorá e logronan di lucha di trahadó i nos lo kosechá un partisipashon masal dia 1 di mei awor i selebrá huntu Dia di Labor 2025.
FUENTE: NÒCHI WILLEM/LIVE99FM
GIPHY App Key not set. Please check settings