Kralendijk,- Debí na diferente faktor tantu e reunion general komo e elekshon no a konta ku un partisipashon real di e miembresia.
Faktornan manera áwaseru, orario, votamentu físiko ku papel i pòtlot i kombinashon di dos reunion a keda indiká a base di un quick scan bou di miembresia komo e motibunan prinsipal pa e partisipashon bou di nivel.
Den un reunion di direktiva di djabièrnè 17 d yanüari 2025 a tuma e siguiente desishonnan:
E resultado di e elekshon di djamars 14 yanüari no ta representativo pa ku e kantidat di miembronan ku derecho di voto den AFBW.
Komo tal e resultado di e elekshon no ta keda rekonosé, pues no ta bálido i lo konvoká un elekshon nobo. E biaha aki e elekshon lo ta elektróniko, manera esaki a tuma lugá den e elekshon di 2022. Tambe lo krea e posibilidat pa pasa vota elektróniko na Kas Sindikal di AFBW pa esnan ku ta deseá esaki i mui en espesial pa e miembronan ku mester di asistensia pa vota elektrónikamente.
Den un kampaña di informashon ku pronto lo sali, tur miembro lo por bai tuma nota di e dianan i e orario ku lo por vota den e elekshon. Tambe lo tin un introdukshon mas amplio di tur e kandidatonan ku a pone nan mes disponibel pa un puesto den e direktiva nobo.
Nos kier rekordá tur miembro ku pronto lo bai organisá kursonan di formashon pa e funshon nan di shòpsteward. Un petishon ta bai pa tur trahadó ku ta miembro na e diferente kompanianan kaminda AFBW ta representá i ku ta interesá pa inskribí pa partisipá na e kursonan aki.
Inskribí bo mes sea personal na AFBW òf via e meil na vakbondafbw@gmail.comku kopia sandrine@wildemanlegal.com.
Nos kier a supliká miembronan interesá pa hasi esaki mas pronto posibel pa asina por regla ku dunadó di trabou orarionan pa boso por sigui e kursonan aki.
FUENTE:AFBW/LIVE99FM

GIPHY App Key not set. Please check settings