DISKURSO DI PRESIDENTE DI SOCIEDAD SAN ANTONIO DE PADUA,CARMO (BUBUI) CECILIA.

Kralendijk,- Un pabien na tur miembro di nos Sosiedat. Awe ta un dia históriko pa Rincon en partikular i Boneiru en general. E dia ku un organisashon ta kumpli 100 aña di eksistensia.

Mi ta riska bisa ku ta e organisashon privá di mas bieu aki na Boneiru. 100 aña di eksistensia aktivo sin interupshon. Ta algu ku nos mester ta orguyoso di dje.

Awor mi ta bai presentá e miembronan di direktiva di Sosiedat:

Elvin Trinidad, vise-presidente, Urbaline Abrahams-Koeks, sekretaria, Agnes Koeks-Mercera, segundo sekretaria, Elsmarie Koeks-Cicilia, tesorero, Xioëlla Janga, segundo tesorero i Aura Janga, miembro.

Tambe mi ke presentá e representante di Sosiedad San Antonio de Padua na Korsou: Aisha Voges-Coffie.

E vishon di e persona ku a bin ku e idea, Alexander Simon Pourier, i esnan ku a lanta nos Sosiedat e tempu aya, a resultá di tabata bon. Te awe e vishon ta konta. Sosiedat ta soru pa un entiero digno pa su miembronan.

Tempu a kambia pero e meta di Sosiedat ta konta ketu bai. Nos mester bai ku tempu i esei e direktiva aktual ta hasi. Nos tarea den direktiva ta pa  Sosiedat por kontinua ku su aktividatnan kumpliendo ku e eksigensianan di e tempu di awor.

Asina nos por bisa ku nos a modernisá e statuutnan di Sosiedat dos aña pasá. Nos ta digitalisando e pago di kontribushon poko poko pero sigur: miembronan por paga online, nan por swipe djadumingu serka tesorero. E digitalisashon di e atministrashon finansiero ta tumando lugá.

Un punto masha importante ta ku direktiva mester manehá Sosiedat na un manera korekto segun lei i regla pa tur kos kana na ordu.

Direktiva mester hiba un maneho bon di e sen di e miembronan. Tesorero ta responsabel pa kobra kontribushon, hasi pagonan i hasi atministrashon di e sennan di Sosiedat. Esei ta tuma lugá bou di kontrol mensual di direktiva. Tur luna direktiva tá kontrolá tesorero.

Mas aleu un kontroladó eksterno i un komishon di kaha ta kontrolá e parti finansiero.

Despues direktiva ta duna kuenta i rason na miembronan den reunion general anual den kua ta presentá kuenta di ganashi i pèrdida i tambe balansa di e organisashon.

Huntu ku esei direktiva mester hiba un maneho debido pa asina garantisá e eksistensia di Sosiedat.

Loke direktiva ta sinti falta di dje ta e interes di miembronan pa sa kon ta baiendo ku nan organisashon i kon direktiva ta hiba su maneho. Esei mi ta bisa pasobra nos no ta haña kuorùm na nos reunionnan general. I kuorùm ta 50 miembro. Statuutnan ta permití ku nos por tuma desishon sin kuorùm.

Despues di awe nos ta spera ku mas miembro lo akudí na reunionnan general.

Selebrando 100 aña di ekstensia awe ta pone ku nos komo direktiva tin e responsabilidat pa sigui manehá nos Sosiedat na e manera korekto i miembronan sigui kumpli ku nan deber manera mester ta.

Otro punto ku ta hasi e dia di awe historiko ta e apertura ofisial di e kas di Sosiedat nobo.

Mi ta bai duna un bista di kon bin nos a yega na e kas di Sosiedat nobo.

For di aña 2018 i 2019 direktiva a realisá ku e mantenshon ku nos tabata duna na kas di Sosiedat no tabata sufisiente. Nos mester a hasi un mantenshon grandi pasobra mester a kambia dak, murayanan ta sker kada biaha di nobo, flur no ta bon.

Esei a pone ku nos a kuminsa kana kaminda pa yega na fondo pa hasi mantenshon grandi. E fondo regular di Sosiedat no ta sufisiente pa hasi mantenshon grandi. Nos a kuminsa aserka organisashonnan hulandes pa pidi fondo. Esaki no a duna resultado. 2019 a pasa i 2020 a pasa sin ku nos por a keda kla ku fondo.

Prinsipio di 2021 den un kombersashon ku diputado di e tempu ei sr. James Kroon, mi a disidí di puntré kiko e posibildatnan ta pa gobiernu yuda Sosiedat ku e mantenshon di e edifisio. Mi mester bisa ku semper Sosiedat a funshoná independiente di gobiernu i e petishon aki ta unu di un biaha so. Sr. Kroon su reakshon tabata positivo i einan nos a mira e posibilidat pa yega na fondo.

Kombersashonnan a kuminsa i kontinua te ku nos a yega na BOG. Enbolbimentu di e direktor di BOG, sra. Adely Susana – Jansen, i e arkitekto di e kompania den e kombersashonnan a yega te na kaminda ku e opinion tabata ku mantenshon lo no yuda e edifisio masha pasobra e tabata den un situashon basta malu. Ta mihó papia di konstruí un edifisio nobo.

Lo tabatin mester di mas sen. Sr. Kroon a sigui hasi esfuerso i ku sosten di su kolega di e tempu ei diputado sra. Nina den Heyer gobiernu a tuma e desishon pa duna un supsidio na Sociedad San Antonio de Padua.

Un gradisimentu masha spesial na sr. Kroon di parti di nos organisashon, ya ku ela komprende e situashon i a duna un man pa por realisá e proyekto aki.

Mi ta bisa esaki pasobra na aña 1940 e miembronan di Sosiedat a traha e prome kas di Sosiedat. Den e tempu aki no ta posibel pa traha den e mesun forma di e tempu aya. E tempu ta otro i pensamentu- i sistemanan a kambia kompletamente. 

Nos mester aserká e situashon di otro forma. I ta aki  sr. Kroon su aporte a resulta sumamente balioso pa Sociedad San Antonio de Padua. Mi mester bisa aserka ku ta sumamente difisil pa splika e meta di e organisashon aki na hendenan ageno na nos komunidat, ya ku nan no ta komprende i nan ta pensa di loke nan tin kustumber di mira.

Un danki grandi na e gobiernu anterior pa esaki. I tambe un danki na direktor di BOG, sra. Adely Susana – Jansen i e komishon Sport en Bewegen.

Trabounan a kuminsa na desèmber 2023 ku tumbamentu di e edifisio, i ya foi prinsipio a resultá ku nos a haña nos ku “meerwerk”. Nos a aserká gobiernu atrobe. E biaha aki ta e gobiernu aktual.

Diputado sra. Nina den Heyer, diputado sr. Clark Abraham i sekretario sr. Christopher Frans i sra. Gianni van den Heuvel ta haña un danki pa e aporte pa nos por a kaba e proyekto aki.

Tin mas hende pa gradisí. Taxabon, Nando Koek i Jozef Koc pa e diseño i guia i kontrol di e trabou.

Gerrel Construction, Lèlo Coffie pa su trabou i ideanan durante e trabou i tambe su trahadonan.

Pero pa Sosiedat a sigui funshoná nos a risibi masha bon koperashon di Sunbelt Realty ku a fasilitá nos Kas Schermer pa tesorero por a sinta tur djadumingu i pa direktiva por a reuní.

Tambe nos a risibí koperashon di ZW-Groep  i Cocari pa usa sala pa reuní.

Tambe di sra. Antonilia Cicilia ku a fasilitá nos espasio pa pone nos stulnan.

Un punto masha importante den e proyekto aki ta e komprendementu i union ku tin den direktiva. Ta grasias na esei ku nos por a realisa e kas di Sosiedat nobo aki pa nos miembronan, pa Rincon i pa Boneiru.

Un danki masha spesial na tesorero sra. Elsmarie Koeks ku banda di su tarea den direktiva ta kumpli ku pagonan i atministrashon di e proyekto aki pa asina por duna kuenta i rason na miembronan i tambe na gobiernu.

Un danki na Virgy Balentin ku a enkargá su mes ku e mobilario.

Miembronan i komunidat di Rincon i Boneiru, ata boso kas di sosiedat nobo.

E sala aki ta na ordu pa ora di fayesementu risibi kondolensia i pone defuntu reposá. Pero e ta disponibel tambe pa reunion, enkuentro, charla i workshop di organisashonnan sosial. Un sala multifunshonal pues. E edifisio aki tin tur fasilidat pa por hasi uso di dje.

Tambe nos a kumpli ku deseo di hopi aña di Rincon pa krea e posibilidat pa Rincon por tin un frizer. E posibilidat tei pa pone un frizer. Nos ta den kombersashon ku Nos Consuelo pa por realisá esaki.

Ku e organisashon ku nos tin aktualmente i e kas di Sosiedat nobo aki Sociedad San Antonio de Padua ta kla pa drenta su di dos siglo.

Pa e selebrashon aki tambe nos tin palabra di gradisimentu pa reverendo diákono sr. Chonky De Lannoy, sr. Arthur Sealy, sra. Christy Cecilia di Chrystal Innovations ku ta kordiná e selebrashon, maestro di seremonia sra. Lijntje Coffy – Kroon, Surround Vibe pa sonido i sra. Junila Kroon pa e dekorashon.

Miembronan di Sociedad San Antonio de Padua, un biaha mas pabien di 100 aña di nos Sosiedat i ku nos Kas di Sosiedat nobo.

Laga nos halsa nos kèlkinan huntu pa selebrá 100 aña di Sosiedat i kas di Sosiedat nobo. Hopi 100 aña mas! Salú!

FUENTE:FITTIPALDI PIETERSZ/LIVE99FM