ELIANA PROME POWER LIFTHING

KRALENDIJK—Djaluna e siman aki Eliana Makaai a pisa suela na Boneiru, despues di a kompetí na Hulanda den e deporte di powerlifting.

Poko despues ku KLM a aterisá, Eliana a sali for di sala di yegada, pa toka su famia i otronan ku a bini pa busk’e. Un alegria pa e famia, spesialmente e mama i tata, ku nan yu a logra kompetí i yega te na di 4 lugá. Ta trata di promé partisipante femenino di powerlifting ku a yega di partisipá bou di Bandera di Boneiru. Eliana: “Mi a bai partisipá na SBD Cup, e deporte di powerlifting i yega te na di 4 lugá den e kategoria di weight class 57. Promé biaha ku mi a bai un kompetensia ofisial, kaminda bo por kolekta punto pa por klasifiká pa un national championship. Mi ta bisa nos a bai pa eksperensia. E tabata diferente kos ku nos a pasa den pa mi gara eksperensia. Otro aña mi ta bai mihó prepará i ku e deseo pa premio grandi ku ta oro. Semper mi tabata hasi deporte. Dos aña pasá, mi a bai trein na gym serka serka Ingrit, einan nos a kuminsá gewon trankilo i dado momentu Ingrit a bisa mi, e ta ripara ku mi tin potensial pa un kompetensia. Asina nos a kuminsá trein mas dirigí den e deporte di power lighting. 2 aña a pasa i mi tabata 10 kilo mas pisa di loke mi ta awor. Mi deseo tabata pa mi bai den tal direkshon i mi a traha duru ku mi coach, pa logra i el a bai bon. Den 7 luna mi a pèrdè e peso pa logra mi meta. Awor mi mester mantené e peso pa mi bolbe kompetí. Diferente kategoria tabatin i mas ku 350 hende a kompetí kontra otro, mayoria tabata hulandes Europeo. Kisas na Boneiru tin mas hende ku por práktika e deporte di powerlifting, sigur nan por djòin i kisas na 2025, nos por bai ku un grupo for di Boneiru, representá Boneiru den power lifting aya na Hulanda.

FUENTE:FITTIPALDI PIETERSZ/LIVE99FM