MESTER TIN MAS KONTROL RIBA PREIS DI PRODUKTONAN AUNKE TA MERKADO LIBER

Kralendijk,- Si tin un pais na mundo kaminda e sistema kapitalista ta reina i kaminda e prinsipio di merkado liber ta konta, antó esei ta Merka. Den e próksimo elekshon pa presidensia di Merka, e aktual vise-presidente Kamala Harris a anunsiá dos medida ku e kier tuma ku a hala mi atenshon komo sindikalista. Nan ta regulá stipulashon di preis irrasonabel i eliminá impuesto riba propina. Sra. Harris ta un eksponente di e partido Demokrat di Merka ku konosé komo prinsipio Hustisia Sosial pa Un i Tur.

Den e kuadro ei nan a bin konstatá ku e prinsipio di merkado liber no ta dunando e resultado deseá esta ku preisnan ta baha. Al kontrali, a bin tuma nota ku tin stipulashon di preisnan haltu sin ku ta motivá esakinan i ku ta sumamente irrasonabel i ku entre otro ta krea inflashon den nan ekonomia. Aki na Boneiru den sindikalismo nos a bin ta señalá e fenómeno aki i a atvertí nos gobièrnu pa usa e instrumentonan legal na su disposishon pa kontrolá loke nos ta yama abuso riba e tereno aki. Sindikalismo por a tuma nota si ku tin a bin ku akshonnan ku klaramente pa nos en todo kaso a konfirmá ku tin abuso den stipulashon di preisnan. Den e sektor di kuminda spesífikamente tin e impreshon ku ta un wild wild west ta tumando lugá.

Tambe mas i mas ta drenta kehonan serka nos ku klientenan ta eksperenshá ku den rèki ta pone sierto preis pa asina hasi e podukto atraktivo pa kompra pero ku ora yega na kaha e kliente tin ku paga un preis muchu mas haltu di loke tabatin den e rèki. I ainda tin tambe e reklamo di produktonan ku a pasa nan fecha di vensementu i ku por resultá dañino pa salú di nos hendenan. Keho ku pa loke ta trata e  idioma ku ta usa riba etikètnan di produktonan tambe ketu bai ta un sumpiña den wowo di konsumidó. Hopi desapuntá sindikalismo ta den  e gobernashon ku asignatura sosial demókratá ku ta di e mesun fundeshi ku e partido demokrat na Merka i ku tin hustisia sosial pa un i tur komo un di su prinsipionan, pero tòg ta laga kosnan sali for di man asina aki.

E di dos medida ku Kamala Harris kier logra i den esaki nos por a tuma nota ku Donald Trump ta di e mesun opinion ta eliminashon di impuesto riba propina den e sektor di hospitalidat, esta hotèl, restorant, kòfishòp, bar en fin tur establesimentu ku ta duna servisio. Esaki ta un tema ku sindikalismo pa años ta lucha pe den e sentido pa hasiele un tema di diálogo. Den sektor di servisio te na e momentonan aki si bo risibí un propina pa bo bon servisio den un forma kèsh, ounke pa lei bo ta obligá di duna esaki komo bo entrada na fin di aña  di moda ku bo tin ku paga belasten, den práktika esaki no ta sosodé. Loke si ta sosodé ta ku si e kliente paga e propina via su credit card e ta drenta den e atministrashon di e establesimentu i esaki ta konta esaki komo entrada riba e salario na momento di paga i ta retené e porsentahe pa lei pa belasten. Mirando ku gobièrnu Ulandes a anunsiá ku pa 2025 nan ta bin ku un plan di belasten nobo ku e base ta pa esnan ku ta gana mas paga mas i asina krea un komunidat mas hustu pa loke ta entrada i asina kombatí pobresa, sindikalismo lo ke pa pone e tema aki tambe riba mesa pa diskushon. E lo ta un forma pa kombatí entrada abou di e klase trahadó ku lo no mester paga belasten riba dje i esaki por sirbi pa tanten ku nos sueldo minimo no yega na e nivel ku e mester ta. Un medida asina ta yuda tambe pa kontené e gastunan salarial pa e dunadó di trabou. Al  fin al kabo esaki mester ta e lucha komun, esta ku rikesa di nos pais ta ser repartí den un forma hustu, eliminando e desigualdat grandi den entrada entre gruponan di nos pais i hasi tur loke ta na nos alkanse pa mantené kosto di bida i kosto di hasi negoshi mas abou posibel. Pa sindikalismo esakinan ta faktornan ku ta duna garantia pa un sosiedat husto, inklusivo i di un kalidat di bida haltu. Nos por basta nos ke realmente.

Fuente:USIBO/live99fm