KU PASENSHI BO TA GANA GLORIA !

Kralendijk, – Despues ku e aktual koalishon , konsistiendo di frakshonnan; DP, M21 I Cyrill Vrolijk, a asumí e responsabilidat pa goberná e isla Boneiru na luna di Oktober último , nos mester remarká ku enrealidad a tuma tempu pa revisá, analisá I adaptá proyektonan ku a heredá di e koalishon anterior , promé ku kontinuá ku ehekushon di esakinan , tabata nesesario I na su lugá! E koalishon aktual deliberádamente a skohe pa goberná e pida baranka aki na un manera drechi, kontrolá I na òrdu.Diferente for di e koalishon anterior, ta tuma e tempu nesesario pa investigá, planea i prepará kada proyekto debídamente proméku pasa esaki pa ehekushon. Tantu proyektonan nobo, komo esnan ku a heredá for di e Kolegio ehekutivo anterior tin ku pasa dor di e mesun proseso. 

Di e forma aki e Kolegio Ehekutivo aktual ta trata tur dia di nobo pa evitá di kore tuma desishonan deskabeyá i ehekutá proyektonan purá purá djis pa hunga populista I ku finalmente ta resulta disastroso I ta krea gastunan astronomiko pa Gobiernu unda despues ta pueblo tin ku karga ku pago di esakinan ku nan sen di belasting. 

Netamente den e kuadro aki e Gobiernu aktual ta introdusí un fórmula   denominá komo “ R&O den akshon “ unda lo bai enfoká riba aspektonan manera ; – Reparashon, mehorashon I mantenshon di e systema di desague aki    na Boneiru. – Korekshon I limpiesa di roi- I damnan. – Mentenshon I rekonstrukshon di nos kareteranan !

Nos ta sostené e systema ku e Gobiérnu aktual a bin ta atende ku e diferente proyektonan riba tereno di infrastruktura teniendo kuenta ku nos naturalesa, kultura I medio ambiente unda e hende semper ta keda sentral !               

Ya kaba habitantenan por a tuma nota di akshonnan ku a kuminsa tuma lugá riba tereno di infrastruktura pa loke ta trata kareteranan di tera den e diferente barionan aki na Boneiru. Nos por menshoná por ehempel kamindanan di kunuku den e bario Playa Grandi I Rincon. Habitante I kunukeronan ta súmamente kontentu ku e resutado final pa loke ta trata e karateranan aki I ta komenta ku esaki ta brindanan muchu mas fasilidat pa bishita kunuku I famianan ku ta biba den zona bèrdè konforme nos ROB.

Tambe e echo ku finalmente ta bai dedika atenshon na e kaminda di Playa – Rincon,na e momentunan aki na e partinan ku ta exigí atenshon mas urgente lo bai na kita e fundeshi na sierto segmentunan di kaminda  y pone rant nobo di beton y pone kapa nobo di asphalt lokual ku a kai den mashsa bon tera serka spashalmente habitantenan di Rincon

Ta di kompronde ku ehekushon di proyektonan na òrdu I duradero, ta eksigui hopi tempu, investigashon I preparashon pa por planea I ehekutá esakinan na un manera korékto I benefisioso pa nos habitantenan !

Aparte di e plan di infrastruktura aki, “ R&O den akshon “ , nos kier a enkurashá e Kolegio Ehekutivo aktual pa kontinuá tambe ku e trabounan di preparashon I ehekushon pa loke ta trata proyektonan relashoná ku demas sektornan ku tambe ta di vital importansha pa bienestar di nos pueblo. Nos ta spera ku dentro di poko, Gobiernu, pa medio di e diputadonan konserní lo sa di publiká e diferente plannan interesante ku ta den preparashon I ku ta na fabor di e komunidat aki pa loke ta trata e sektornan soshal, kultural i ekonómiko. Un aspekto súmamente krusial na e momentunan aki, ta e echo ku mester tene bon kuenta ku e maneho espasial ku tin riba mesa aktualmente.

Esaki ta nifiká ku debídamente mester tene kuenta ku un planifikashon sostenibel I sigur, unda ta enfoká prinsipalmente riba  desaroyo ekonómiko sostenibel, un medio ambiente saludabel, un repartishon espasial hustu I protekshon di nos balornan kultural !    

Finalmente nos kier a gradisí nos pueblo pa e pasenshi desplegá último lunanan I nos kier a partisipá ku nos lo komprometé nos mes pa sigui atende ku e nesesidatnan di e pueblo aki ku seriedat, vigilando I alabes sosteniendo e aktual Kolegio Ehekutivo pa loke ta trata tomo di desishonnan ku ta faboresé I ta na benefisio di nos komunidat engeneral 

FUENTE: DANY CRESTIAN/LIVE99FM