BONEIRU MESTER DI MAS Y MAS IMIGRANTE PA YUDA KONSTRUÍ BONEIRU.

Kralendijk, – Boneiru ta kresiendo rápido. Ta p’esei Boneiru mester di mas y mas Imigrante pa yuda konstruí Boneiru. Tin ku ta bini Boneiru pa gana poko sèn so y despues bai nan pais bèk. Pero hopi di nan ta stima Boneiru y nan ta spera di por keda aki permanentemente. Kon ku sea, e grupo di imigrantenan (mayoria di nan Latinonan) ta kresiendo tambe. Pero hopi biaha nan no ta wòrdu tratá humanamente. Esei no ta korekto. Si nos no mester di nan, e ora ei nos no mester invitá nan pa bin traha aki. Pasobra ta riba invitashon di doñonan di trabou mayoria di nan ta bini.

Si nos mester di nan pa yuda konstruí Boneiru, e ora ei mester trata nan korektamente y humanamente. No ta promé biaha ku un organisashon ta lanta pa sali na defensa di imigrantenan en general. De hecho, Fundashon ‘Union di Imigrantenan Boneriano’ (‘UIB’) a ser lantá un 19 di yüni 2007, kier men, 17 aña pasá n’ei y tabata konosí e tempu aya komo ‘Fundashon Internashonal’. A reskatá e fundashon ei, dun’é otro nòmber y a nombra un direktiva nobo. Mishon di Fundashon UIB ta pa defendé derechonan humano y pa krea mihó kondishonnan di bida pa tur imigrante na Boneiru. Ta eksistí vários asosashon y fundashonnan na Boneiru representando imigrantenan di paisnan individual, manera un Asosashon di Imigrantenan di Repúblika Dominikana, otro di Kolombianonan, otro di Peruanonan òf Venezolanonan etc.

Nan tur ta hasi bon trabou. Pero Fundashon UIB lo fungi pa kordiná y uni nan esfuersonan pa di e forma ei logra rèspèt pa derechonan humano di imigrantenan y pa krea mihó kondishonnan di bida pa imigrantenan na Boneiru en general. A base di e prinsipio: ’Union ta Hasi Forsa’.

Pa medio di e komunikado aki, nos Fundashon ke informá henter komunidat, ku pa konsulta òf un asistensia hurídiko, pa imigrantenan residensiá na Boneiru, por komuniká atraves di nos nùmber di kontakto i whatsapp: +599 787 2373. Nos sede ta situá na Kaya José Gregorio Hernández # 16, Antriol òf nos e-mail adrès: fundashonunionimigraboneriano@gmail.com. E fundashon aki lo asistí imigrantenan di tur gruponan étniko na Boneiru.

Na nòmber di FUIB,

Carlos Jiménez

FUENTE:FUIB/LIVE99FM