ABVO BONEIRU TA SELEBRÁ 90 AÑA DI LUCHA SINDIKAL I KOMPROMISO SOSIAL

Kralendijk,- E sindikato general ABVO Boneiru a selebrá su 90 aniversario ku un seremonia spesial na Misa di Coromoto.

Durante e okashon, e presidente Tafila Janga, su direktiva, miembronan i partnernan den komunidat a reuní pa honra e legado di un organisashon ku den e último 15 aña a kambia e panorama laboral den islanan Karibe Hulandes: Kòrsou, Boneiru i Sint Maarten.

Den su diskurso di inspirashon, e Presidente a ekspresá e kontribushon históriko di ABVO Boneiru, Kòrsou i Sint Maarten, inkluso e liderato di Erik “Tjietjie”, un pionero den moveshon sindikal na Boneiru.

“Durante 90 aña, ABVO a para firme ku dignidat pa trato igual i hustisia sosial pa tur trahadó di nos islanan,” segun e Presidente. “Nos historia ta yena ku lucha, balentia i kompromiso sin límite pa protehá e hende ku ta traha i sostené komunidat.”

Enfoke riba Futuro: Inteligensia Artifisial i Transformashon Laboral

E Presidente a pone énfasis riba e desaroyo aselerá di teknologia i Inteligensia Artifisial (AI), ku ta kambia e manera ku mundu laboral ta funshoná.

Segun e Presidente, Inteligensia Artifisial por bira un instrumento pa progreso, pero tambe un reto pa trahadó si no tin preparashon adekuá. P’esei, ABVO ta komprometé pa:

• Kreá espasio pa formashon nobo pa tur trahadó i inkluí e tema den tur negoshashon di CAO.
• Sigurá ku ningun hende ta keda patras den transishon digital.
• Mantené un merkado laboral hustu i humano, kaminda teknologia ta sirbi pa yuda hende, no pa limitá nan.

E Presidente a puntra: “Kon nos por adaptá nos mes pa e eksigensianan nobo ku Inteligensia Artifisial ta trese, i kuantu trabou nos por kreá pa fortalesé e klase trahadó?”

Pa duna un paso konkreto, ABVO Boneiru a anunsiá su plan pa kuminsá duna kursonan di Inteligensia Artifisial na su sede, ku e meta pa prepará miembronan i trahadó en general pa e avansenan digital di awe dia.

Un Yamada pa Union i Vishon Kompartí

E Presidente a finalisá su diskurso ku un mensahe di gratitut i orguyo na su direktiva, shopsteward, miembronan, trahadó en general, sindikatonan, empresanan i pueblo di Boneiru ku a kontribuí na e legado di 90 aña.

“Solamente ku union, diálogo i un vishon kompartí nos por sigui konstruí e brùg briante ku ta guia nos pa futuro. Na nòmber di nos dushi Boneiru: felis 90 aña, ABVO.”

FUENTE: ABVO BONAIRE/LIVE99FM