DEN SEKTOR DI KUIDO AKI NA BONEIRU E DESAROYO PA KU SINDIKALISMO TA UNO SUMAMENTE POSITIVO.

Kralendijk, – Trahadónan den e sektor aki ta konsiente ku UNION ta FORSA i a afiliá masalmente na sindikato. Entre tantu e kontrato kolektivo basá riba un akuerdo general entre Boneiru, Saba i Statia a bira un realidat. E tres fundashonnan ku ta manehá hòspital na Boneiru, esta Fundashon Mariadal, na Saba Saba Cares, na Statia Auxiliary Home i SEHCF na un banda i na e otro banda  e sindikatonan AFBW pa Boneiru, SUPLUA na Saba i All for One na Statia a bai di akuerdo ku e CAO. Huntu ku esakinan tambe Mental Health Caribbean a disidí di uni su mes na e CAO komo dunadó di trabou. Pa loke ta e último aki e bon notisia ta ku e gran mayoria di e trahadónan na Mental Health Caribbean a afiliá na AFBW i djabièrnè dia 19 di yüli último direktor di MHC sr. Eric Jansen i presidente di AFBW sr. Cherrel Kwidama a firma e konvenio di rekonosimentu, kual ta nifiká ku Mental Health Caribbean ta rekonosé AFBW komo e úniko representante legal pa atendé ku e interesnan laboral di e trahadónan na e instituto.

Trámitenan tambe ta tumando lugá pa e trahadónan di MHC na Saba i Statia tambe bira miembro di AFBW. Ku esaki pa loke ta trata e sektor privá tin e promé CAO kolektivo firmá. Loke ta positivo pa menshoná ta tambe ku e otro institutonan na Boneiru, kualnan ta Zorg Werkgroep, Krusada i Primary Care Caribbean, entre tantu e trahadónan di e institutonan aki tambe a afiliá na AFBW i negosashonnan ta andando pa pronto firma CAO ku e institutonan aki tambe. Manera ta konosí BONLAB su trahadónan ya tabata afiliá na AFBW. Na e momentonan aki e CAO general ta konsistí di tres parti, esta sekshon 1 ta trata e parti ku ta deskribí kiko e CAO ta ambishoná pa logra, sekshon 2 ta kubri e parti general miéntras ku e sekshon 3 ta e parti organisatorio den kua kada instituto por negoshá kondishonnan ku ta spesífiko pa nan isla i/o nan organisashon. Ku e logro históriko aki tambe sindikalismo na Boneiru a dal un stap grandi den direkshon di sinergia i den direkshon pa sigui ku e proseso pa yega na kontratonan kolektivo sektorial i kuné por kuminsá papia di entrodusí e lei di “verbindend en onverbindend verklaring” di CAO pa sierto sektornan den nos komunidat. Awor aki den e sektor di kuido a yega na esaki riba un base boluntario i a base di negosashonnan entre e partidonan ku a mira e nesesidat grandi aki pa forma un UNION.

Ku e UNION aki nos lo por sinta tambe na mesa ku ministerio di salubridat pa atendé fondonan nesesario pa garantisá kalidat di kuido, pero tambe ku kalidat di kuido ta kai lanta ku kalidat di e personal ku tin ku atendé ku e kuido i ku nan kondishonnan laboral mester kuadra ku eksigensian di nos tempu. Mi kier duna un pabien na tur esnan ku a traha duru riba e logro aki i a sabi di pasa riba nan sombra, pone interes general dilanti i awe por ta orguyoso ku tin un harmonisashon avansá den loke ta kondishonnan laboral den kuido tantu na Boneiru, komo na Saba i Statia. Nos por basta nos ke a keda demonstrá i  awe ku orguyo AFBW na Boneiru por mustra ku e organisashon pa loke ta sektor di kuido so e ta representá no ménos ku 7 organisashon den kuido. Ta di spera ku esaki por ta un ehèmpel pa otro sektornan kaminda ainda trahadónan ta totobiá pa organisá nan mes. Mi ta referí aki na promé lugá e sektor turístiko, mui en espesial hotèlnan, restorantnan i kafetarianan, kaminda e dunadó di trabou si ta bon organisá den BONHATA i BBE, pero ku e trahadónan ainda no kier realisá ku nan tambe mester uni. Si ekonomia ta dependé di kasi 25% di turismo, esei ta nifiká ku ta boso komo trahadó ta karga e sektor aki pa e produsí pa nos komunidat.  Ser orguyoso di ta trahadó den e sektor ei i ser konsiente ku nos mester ta uní pa nos por haña e benefisionan ku nos mes ta produsí tambe. Nos no por ta planta kunuku ku pal”i fruta i nos mes nos no ta haña un parti hustu di e frutanan ei. Bin bei.

FUENTE: USIBO/LIVE99FM