MPB/UPB TIN MIEDU PA PUITO NAN SALI

‘DESESPERA KU AWOR KU NAN KOMPLISE NAN NO TEI MAS PA SKONDE NAN FECHORIANAN!’

Kralendijk – Ultimo siman nos por a tuma nota di algun akto di desesperashon di parti MPB/UPB i nan perito nan. Ora eks diputado Thielman [MPB] a tuma nota ku a duna despedida di su komplise nan den Direktorado di B&O, spantu a kue su kurpa. Awor e no tin hende pa skonde su fechorianan di ultimo añanan.Anto tokante di bulamentu den business class lo ta na su lugar pa tantu Din Domacasse y eks diputado Thielman puntra nan lider di frakshon di MPB den konseho insular sr Juni Wout ku sí ta bula den business class pa mas detaye, paso ami Dany Crestian nunka ta bula den business class .Ku masha furor nan ta intenta di purba boltu e kos komosifuera ta mal kos Diputado Abraham ta hasi den e aparato. Thielman a lubida ku na 2022 ela kompremete Gobiernu pa mas ku $6 mion sin esaki ta presupuesta? Thielman a lubida ku e mester a pidi Raad pa absolve su aktonan eligitimo? Thielman a lubida ku a sera 2023 ku un defisit di $3 mion doler? Thielman a lubida ku ela presupusta $20 mion na inbershon, pero NO tin e sen ei den kaha? Thielman NO a lubida, miedu e tin ku awor si ku su kompinchi no tei mas, tur puitu lo sali for di bou di tobo.

Esnan ku ta sigui reunion nan di Konseho Insular lo no a keda sorpresa, paso Hefe di Finansas saliente sr. Mark Volmerink i tambe accountant di Gobiernu di Boneiru a splika bon kla den reunion tratando Kuenta Annual 2023.

Mal Maneho Finansiero

Si lo a kontinua ku e maneho finansiero manera e tabata wordu hiba ultimo añanan, Gobiernu di Boneiru lo a hañ’e den un situashon finsiero grave. A sera e aña presupuestario ku un defisit di mas ku 3 MION doler. A spat sen pa loko riba e.o. OvO i un seniorenregeling sin maneho sano su tras. Ademas, pa 2024 a presupuesta 20 MION doler na inbershon, ku Gobiernu di Boneiru no tin. Den e presupuesto 2024 a presenta un sifra di likides ku NO ta kuadra ku e realidat finansiero. Ku e maneho ku tabata wordu hiba lo kontinua, na fin di aña 2024 Gobiernu di Boneiru lo a bati bankarota. Esaki NO ta palabra di mi persona, no ta palabra di Diputado Abraham, pero esaki ta palabra ekspresa pa e hefe di Finansas i Accountant di Gobiernu Boneiru. Konforme Konsehal Dany Crestian ‘Awor, bo mes ta kere ku eks Diputado Thielman ta kontentu ku e berdat di su mal maneho ta sali nan kla? Ta logiko ku no tog? Kiko otro bo kier pa e bisa?’

Por saka sen un biaha

E mal maneho finansiero aki ta pone ku mester remedia esaki rapido pa por inberti sennan kaminda tin nesesidat den nos pueblo.Meskos ku den kada kas di famia y den un negoshi den gobiernu no ta diferente , mal manejo financiero bo ta hanjé presenta despues y ta esaki e gobiernu aki a enkontrá y lo asumi responsabilidad tantu den den eilandsraad y gobiernu pa remedia esaki.Bo por saka sen solamente un biaha, kiermen mester sera e buraku den pipa ku ta kibrá i ta hasi desperdisio di sen di Pueblo pa nos por kaba drecha nos kas (Boneiru).Ta na su luga ku Diputado Abraham ta pone ordu den e aparato, proteha esnan ku si ta traha di buena fe i krea e espasio pa nan por hasi nan trabou manera debe ser. Ta esei ta netamente e tarea ku Abraham a haña di Konseho Insular pa bai hasi.

FUENTE: KONSEHAL DANY CRESTIAN/LIVE99FM