UNITY TA BAI ARUBA PA REPRESENTÁ BONEIRU DURANTE DIA DI BONEIRU 2026

Kralendijk,- Stichting Majorette Korps Unity ta preparando pa un momento speshal den su desaroyo. Di 10 te ku 15 di sèptèmber 2026, Unity lo biaha pa Aruba ku un delegashon di 35 hende: 23 majorèt, 6 miembro di direktiva i 6 mayor, pa representá Boneiru durante selebrashon di Dia di Boneiru. Durante e bishita na Aruba, Unity lo realisá tres presentashon, inkluyendo presentashonnan na skol i un presentashon pa públiko durante Dia di Boneiru. Pa Unity, e biahe aki ta muchu mas ku un presentashon. E ta un momento importante pa e hobennan, pa e organisashon, pero prinsipalmente un honor pa representá Boneiru na Aruba. BONEIRU KU UN POSISHON ÚNIKO Segun informashon di Unity, Boneiru tin e privilegio di konta ku e úniko korps aktivo di majorèt entre e islanan di BES i CAS. Esaki ta duna Unity un responsabilidat speshal. Ora e 23 majorètnan subi avion pa Aruba, nan no ta bai solamente komo miembro di Unity. Nan ta bai komo representantenan di Boneiru. Unity ke usa e oportunidat aki pa mustra ku majorèt ta muchu mas ku marcha, twirl, baile i presentashon. E ta un instrumento pa yuda mucha i hoben desaroyá disiplina, rèspèt, responsabilidat, teamwork, konfiansa den nan mes, perseveransia i liderato. UN ORGANISASHON HÓBEN KU UN META GRANDI Unity a kuminsá su trayekto dia 16 di aprel 2026. Apesar ku e organisashon ta relativamente nobo, den poko tempu Unity a logra mobilisá hobennan, mayornan, direktiva i komunidat rondó di un meta komun. Un di e aktividatnan di fundraising tabata un BBQ ku a bende kompletamente. E sosten di komunidat durante e aktividat aki a mustra ku tin hende ku ta kere den e hobennan i den e trabou ku Unity ta hasi. Tambe Unity a lansa un manera kreativo di fundraising, kaminda un avion a wordu dividí simbolikamente den diferente pida, pa personanan, organisashonnan i empresanan por sponsor un parti i asina kontribuí na e biahe pa Aruba. Tur kontribushon ta yuda Unity pone su hobennan un paso mas serka di e eksperensia importante aki. ARUBA TA E PROME PASO

Aruba no ta simplemente un destinashon pa Unity. Aruba ta e prome paso di un plan mas grandi. E meta di Unity ta pa e organisashon i su hobennan eventualmente por presentá nan mes na e diferente islanan di Karibe Hulandes, pa mas hende por konosé Unity i mira kiko hobennan di Boneiru por logra ku preparashon, disiplina i dedikashon. Despues di Aruba, Unity tin e ambishon pa sigui amplia su presensia. Kòrsou ta entre e siguiente metanan, i den futuro Unity ke eksplorá oportunidatnan pa yega tambe na otro lugánan den region, inkluso Surinam kaminda Unity a origina, Boneiru ,Unity su desaroyo, i awor Aruba komo e prome paso . No ta trata solamente di biaha i presentá. Unity ke krea konekshon, intercambio kultural i oportunidat pa su hobennan sigui desaroyá. 23 MAJORÈT, UN SOLO BONEIRU Pa e 23 majorètnan ku lo forma parti di e delegashon, e biahe pa Aruba ta un oportunidat pa mustra loke nan a siña, pero tambe pa eksperensiá kiko ta nifiká representá nan isla pafó di Boneiru. Nan lo ta akompañá pa 6 miembro di direktiva i 6 mayor, formando un delegashon total di 35 hende.

FUENTE: REKSEL ENGELHART