BELA EUROPEO

Kralendijk,- Si ke komprondé istoria di Bonaire e eksigensia ta pa studié for di bista di e afrikanonan ku a mira bela di e barkunan Europeo ku a yega Afrika.

Ta esei ta e punto di salida pa studia e lodo di istoria ku ta sklabitut i kolonialismo ku a bira fundeshi di e aktual komunidat boneriano.

Ora ta usa kolonialismo ta bon pa splika na ki tipo di kolonialismo ta referí. Den e kuadro ei por diskutí tokante Bonaire su herensia kultural. Bonaire su arkitektura ta kolonial, su enseñansa ta kolonial, su polítika ta kolonial, su gobernashon ta kolonial, su idioma ta kolonial.

Mi no ta sigui e klasifikashon di istoria den diferente époka sino mas bien e partinan komersial, di personanan ku a establesé na Bonaire i eksplotashon di rekursonan natural. Bonaire,manera tur e otro islanan, tabatin fòrti. Nos tin Fort  Oranje pa defendé na promé lugá e parti di komersio di salu.

I e katibunan kontra piratanan Ingles i franses. Den e komersio di salu tabatin nesesidat di trahadó i militar pa defensa di e komersio. Trahadó a bini komo katibu for di diferente parti di Afrika, e indjannan, hende liber, tabata den servisio di WestIndische Compagnie i di Europa a bini militar for di Belgika, Alemania i Hulanda.

For di e tempu ei Bonaire tabata multilingual. Ta sigur ku Bonaire a bira pa e katibu i algun militar un lugá pèrmanente pa biba i Bonaire a bira un kolonia di establesimentu ku te awe ta kontinuá. Nos por wak e famnan di e militarnan manera Evertsz, Thielman, Thodé.

Nos mester bira konsiente ku nos no por biba den pasado i keda wak patras pa forma un konsenshi selektivo ku ta romantisá pasado.Futuro ta e meta i den e kuadro ei tin dos dokumentu importante ku ta kibra ku e sistema politika bieu.

Nan ta Bonaire vishon 2030 i karta di sekretario di estado Eric van der Brug. Tur dos dokumentu ta mustra riba tarea, responsabilidat i obligashon di nos tur.

Kritika riba e dokumentunan aki ta nifiká ku ke keda den e komunidat moribundo di Bonaire. Awor ta ora pa komprondé ku ta trahando riba formashon di un identidat.

FUENTE: ARTHUR SEALY