KOMO UN SIUDADANO I MIEMBRO DI PARTIDO DEMOKRAT MI KE TRESE MI PREKUPASHON TOKANTE E SUBSIDIO KU ENTIDAT PÚBLIKO BONEIRU DUNA NA E KOMUNIDAD DI BONAIRE.

Kralendijk,- E tarifa variabel di koriente ta baha dor di e subsidio i tur hende ta benefisiá di esaki. Ku e subsidio akí, temporalmente e Preis na Boneiru ta bolbe yega mas o ménos $0,33 pa kWh.

Lamentablemente, esaki no ta un solushon struktural pa e pobresa energétiko ku hopi famia ta pasa aden. Ta mihó pa skohe pa un solushon duradero ku ta yuda spesialmente e gruponan mas vulnerabel.

OLB por usa un parti di e sèn akí pa perkurá ku e kasnan di Fundashon Kas Bonairiano (FCB) ta haña panélnan solar i un bateria. Di e manera akí, gobièrnu ta yuda e hende ku ta haña e sla di mas duru, tantu awor komo den futuro.

Ademas, nan lo ta ménos dependiente di e kambio di preis di kombustibel fòsil. E parti di sèn ku sobra por bai direktamente pa e famianan ku mas tin mester de ayudo. E diferensia den entrada na Boneiru ta masha grandi mes.

Tin tres mil famia ku kasi o en realidat no por biba ku e sèn ku nan tin, miéntras ku un otro grupo ta gana dies biaha mas tantu.

E gran diferensia akí ta bini dilanti tambe den e Rapòrt Spies: e 25% di e poblashon mas riku ta gana dies biaha mas tantu ku e 25% mas pober. Pa un hende ku un onderstand of penshun di mas o ménos $1000 pa luna, un resibo di koriente ku ta subí ku $100 mas ta imposibel pa pagá.

Pa un hende ku un entrada di $10.000, e $100 ei kasi no ta hasi niun diferensia. Pesei, no ta mihó pa yuda e habitantenan ku tin un onderstand o un pènshun di AOV so èkstra? Segun mi opinion, esnan ku tin mas forsa mester karga e pesu di mas grandi.

Ami komo siudadano prekupa, pasombra kiko ta bai pasa despues e tempu e subsidio a kaba. E preis ta subi bek na su nivil aktual, kon gobierno ta bai juda e hende di nobo.

Paso ketu bai esun ku ta den onderstand of hanja penshun no por paga e preis di koriente haltu. Komo Gobierno ban sinta huntu pa nos buska un solushon duradero.

FUENTE: ALSI ANTHONY