SINDIKALISMO NA BONEIRU A KONOSÉ UN SIMAN HOPI BALIOSO I FRUKTÍFERO PA E KLASE TRAHADÓ I SU FAMIA.

Kralendijk,- Sindikalismo na Boneiru, igual ku sindikalismo rònt mundo ta lucha pa derechonan fundamental di e trahadó i su famia.

Nos ta lucha pa dignidat di e hende i dignidat  di e famia. Hamas i nunka por remplasá dignidat humano ku ta un derecho humano fundamental pa faboritismo polítiko i sigur no pa usa nesesidat di e ser humano pa intenshonnan polítiko.

Ta p’esei sindikalismo na Boneiru a subi kaya i mustra gobièrnu Ulandes ku e mester kumpli kabalmente ku artíkulo 20 di nos konstitushon ku ta garantisá eksistensia mínimo di e boneriano i e mester traha a base di lei provishonnan pa kada ser humano i nan famia por hiba un bida digno.

Ta p’esei na aña 2022 i 2023 masalmente sindikalismo a subi kaya kompañá pa e klase trahadó i su famia i a logra.

I ta un bèrguensa pa mira awe polítikonan eskohé òf no eskohé ainda pa pueblo, representando e klase trahadó i su famia públikamente organisá i apoyá partimentu di produkto i kuminda i ta saka potrèt i filma hendenan ku kisas den nesesidat a bin buska kuminda.

Yuda bo  próhimo no ta nada malu pero visiblemente yuda bo próhimo kaminda klaramente 5 luna promé ku elekshon bo ta hasiele ku e intenshon pa gana simpatia polítiko ta inétiko i ta riba ránt di mancha nos proseso demokrátiko di votamentu liber ku un aktividat ku tin tur ingrediente di kumpra voto.

Hasta nos mester puntra nos mes si no tin violashon di privasidat di hende na momento ku bo ta filma i saka potrèt di hende den nesesidat i vulnerabel sin nan pèrmit.

E di dos pregunta ta a base di ki kriteria a husga ku e hendenan a bin tuma yudansa den forma di produkto i komestibel.

Kua kompania ta tras di e “gesto” aki i ku ki intenshon. Sigur tur e preguntanan aki ta bálido pasobra ela bira mas un show polítiko ku un akto di karidat..

Dikon no a entregá e produkto- i komestibelnan  na banko di kuminda i laga nan repartí e produktonan den un forma independiente i ophetivo. Ta dikon dos miembro di e aktual gobièrnu tabata presente, miéntras ku nan tin tantu e espasio di maneho komo e fondonan disponibel pa atraves di nan servisio di Samenleving & Zorg i departamentu di Finansas duna e yudansa dirigí.

Un biaha mas nan mes a demonstrá di no t’ei pa e pueblo pero pa tur sorto otro kos ku no ta interesnan di e pueblo. Kon nan por kontradesí e atvertensianan serio aña pasá di tantu USIBO i BUISINES FEDERATION BONAIRE, di gezaghèber den un karta, pero awor hasta di Sekretario di Estado ku echosnan ku nan no por bari for di riba mesa.

Sindikalismo su pregunta ta na e polítikonan ku a organisá i tabata t’ei pa apoyá, boso ta na fabor di un estado di derecho òf boso kier bai bèk na e tradishon malu di duna kos pa haña voto? Papia kla ku e pueblo, pasobra boso ta e proménan ku a kritiká Maneho i Vishon 2050, trahá pa profeshonalnan yu di tera.

Pues boso kier goberná e isla aki a base di faboritismo i pone nos estado di derecho demokrátiko un banda? Boso a konfirmá loke shòpstewardnan a haña den nan kurso pa loke ta trata e historia di derechonan ku sindikato i komunidatnan mester a lucha p’e i ku hasta a bai será  i hasta a muri p’e. Sindikalismo huntu ku komunidat no solamente mester konservá i kuida derechonan atkerí, pero mester defendé nan tambe kontra korientenan ku e promé oportunidat ku nan haña kier kita esaki i tuma dominio riba e klase trahadó.

Votamentu liber i independiente ta un derecho sagrado ku a ser manchá den pasado pa kumpramentu di voto den tur sorto di forma.

A kasi eliminá esaki dor di leinan ku ta ankra derecho di e votadó i hasta tin proposishon riba mesa pa bin ku un lei di partidonan polítiko. Ata awor públikamente ta parse ku kier re-entrodusiele 5 luna promé ku elekshon pa motibu ku nos gobièrnu, nos politikonan eligí ta neglishá por kompleto nesesidatnan di e klase trahadó i su famia.

Ata algun ekspreshonnan pa e klase trahadó i su famia meditá i pensa ariba. Voto no ta kos di bende; seguridat di eksistensia ta un derecho i no un medio pa negoshá kuné; seguridat di eksistensia ta ankrá den lei i no den man di polítikonan; kombatí pobresa ta protehá demokrasia; esun ku kier kambia seguridat di eksistensia pa voto, ta mina nos estado di derecho i mester responsabilisá su mes dilanti outoridatnan.

FUENTE: NORWIN NÒCHI WILLEM, KONSEHERO USIBO