ARUBA: GOBIERNO AVP FUTURO A PRIVILEGIA SCHIPHOL Y LUBIDA PROFESIONALNAN LOCAL EXCEPCION PA SCHIPHOL SI, PERO NO PA SETAR WEB NI ELMAR? MEP TA PIDI CLARIDAD

Oranjestad – Durante e debate riba e Landsverordening Normering Topinkomens (LNT) e siman aki, fraccion di MEP a enfatisa cu e ley aki a wordo introduci bou di circunstancianan hopi dificil. Na 2020, durante e periodo di COVID-19, Hulanda a pone como condicion pa Aruba haña fondo, cu Aruba mester introduci e LNT. E maximo riba salarionan di funcionarionan halto den companianan estatal tabata un di e exigencianan cu tabata conecta na e sosten financiero. MEP ta reconoce cu e LNT por y mester worde evalua y, caminda ta necesario, adapta. Pero esaki mester sosode corectamente, cu transparencia y siguiendo e procedura corecto.

EXCEPCION PA SCHIPHOL SI, PERO PA LOCALNAN NO

Un punto cu ta sobresali den e debate ta e excepcion cu Gobierno mes a duna na AAA/Schiphol. E excepcion aki a wordo duna a base di articulo 12 di e LNT, y segun minister Wever, e excepcion aki a wordo duna pasobra ministernan Eman y Cicilia tabata kier esaki. Pues mester conclui cu ministernan Eman y Cicilia a scohe pa privilegia un persona di exterior, y a lubida riba profesionalnan local.

Pero, na e mes momento, Minister Wever a declara den Staten cu un excepcion di e tipo aki no por wordo duna na otro directornan, pasobra aplicacion di articulo 12 lo ta incorrecto. Esey ta trece un pregunta fundamental serca fraccion di MEP: Pakico AAA/Schiphol si por a haña un excepcion, mientras cu otro directornan ta wordo bisa cu esaki no ta posibel? No tin criterianan obhetivo cu ta determina ken por haña un excepcion y ken no, e gobierno aki ta aplica un maneho di ‘free for all’, cu ta perhudica profesionalnan local.

Pa MEP, un ley por tin credibilidad solamente si e mesun regla y criterianan ta worde aplica di un manera consistente y transparente. Un excepcion pa un, mientras cu na otro banda ta wordo bisa cu e mesun posibilidad legal no ta existi, mester wordo splica claramente.

Y e papel di Hulanda: Hulanda ta midi cu dos midi?

Minister Wever a informa Parlamento cu el no a informa Hulanda prome y no a consulta cu Hulanda tampoco tocante e cambionan propuesto na e LNT. Esaki ta particularmente relevante pasobra e LNT originalmente a wordo introduci como un di e condicionnan conecta na e sosten di likides di Hulanda.

P’esey colega Parlamentario Edgard Vrolijk a pidi e Minister pa splica con e ta pensa di trata e cambionan aki cu Hulanda.

MEP ta cla den su posicion: evaluacion y adaptacion di e LNT ta necesario. Pero no dos midi, no cu privilegio pa compania di exterior, no ‘willekeur’ y sigur ningun cambio fundamental sin evaluacion prome, sin un fundamento cla, sin criterianan transparente, y sin e procedura corecto.

FUENTE: PARTIDO MEP/LIVE99FM