KONFERENSIA EKSITOSO DI CARICOM TOKANTE REPARASHON TA HIBA BOS DI PUEBLO BONERIANO NA PLATAFORMA MUNDIAL

Kralendijk,- Despues di su partisipashon na di Tres Konferensia Regional di CARICOM tokante Reparashon, ku a tuma lugá  final di siman pasá na Barbados, James Finies, fundador di BHRO—un Miembro Asosiá di Komishon di Reparashon di CARICOM i akreditá na Nashonnan Uni—a deklará ku e bos di Boneiru a ser presentá riba un plataforma importante regional i internashonal pa hustisia reparativo.

E konferensia a reuní lidernan Karibense, representantenan internashonal, akadémikonan, organisashonnan di sosiedat sivil i defensornan di hustisia reparador pa enfoká riba futuro di e movementu mundial pa reparashon.

Entre e mensahenan poderoso presentá tabatin e yamada di Presidente di Komishon di Reparashon di CARICOM, Profesor Sir Hilary Beckles: “Laga e negoshashonnan kuminsá.” Promé Minister di Barbados, Mia Amor Mottley, a enfatisá e demanda di Karibe pa hustisia, miéntras Sekretario General di CARICOM, Dra. Carla Barnett, a deskribí reparashon komo algu ku fundamentalmente ta trata di “rekonosementu, responsabilidat i transformashon.”

Pa medio di su intervenshonnan di gran impakto, i su partisipashon aktivo, James Finies a garantisá ku historia, eksperensianan i bos di Boneiru a wordu skuchá i rekonosé komo parti di e importante diálogo regional i global aki. E mensahenan aki tabata poderoso pa Boneiru i henter Karibe.,

Ademas, pa medio di su intervenshonnan i partisipashon, Finies a enfatisá ku e konferensia a demostrá kon e movementu pa reparashon ta progresándo mas aleu ku konmemorashon, den direkshon di akshon, diálogo serio i konstruktivo, negosashon i partisipashon signifikante.

“Boneiru tin un bos, i nos lo sigui hiba e bos ey na e plataformanan regional i internashonal di mas haltu. E mensahe for di Barbados tabata kla: e  momento a yega pa pasa di palabranan na akshonan konkreto” 

Miembro Asosia – Komishon di Reparashon di CARICOM

Akreditá na Nashonnan Uni

FUENTE: JAMES FINIES