ARUBA: “PARLAMENTO DI ARUBA TA STROBA OPOSICION EHERCE CONTROL RIBA GOBIERNO. SIN CONTROL NO TIN DEMOCRACIA”

Oranjestad,- Den reunion den parlamento fraccion di mep a expresa preocupacion grandi  cu e espacio pa oposicion haci su trabou di control ta wordo cada biaha mas limita. Preguntanan ta keda sin contesta, reunionnan ta wordo nenga y pa haya informacion parlamentarionan ta wordo obliga pa busca otro caminda, via LOB, LAR y hasta Ministerio Publico, pa haya informacion pa por haci nos trabou.

Segun MEP, e situacion ta bira aun mas preocupante ora instancianan cu kier scucha Parlamento ta wordo limita den nan contacto cu oposicion. Invitacionnan di instancia manera KvK, minister a prohibi presencia di parlamentario, mientras un peticion pa reunion cu AZV tambe a wordo blokea pa e minister.

“Ki espacio nos ta keda cune como oposicion pa haci nos trabou?”, ta e pregunta di lider di fraccion Evelyn Wever-Croes.

E Comision Fiho di Finansas tabata un di e poco espacionan unda oposicion por a haya informacion, haci pregunta y scucha instancia. Bou di presidencia di Shailiny Tromp-Lee (MEP), e comision a reuni regularmente y a duna oido na tur instancia cu a pidi pa wordo scucha. Awor Futuro a dicidi cu ta kita e presidencia di MEP pa nan mes tuma e presidencia.

“Si e comision no tabata funcionando, un cambio di presidencia lo por ta comprensible. Pero net e Comision di Finansas ta un di e comisionnan cu a reuni mas y a cumpli cu su tarea di scucha, investiga y controla. Y awor a kita e presidencia di e unico presidente cu a haci su trabou.”

Pa MEP, e punto no ta solamente ken ta presidente di un comision. E ta trata di e principio fundamental cu oposicion mester por controla gobierno y Parlamento mester por haci su trabou.

“Democracia no ta solamente e derecho di mayoria pa manda. Democracia ta tambe e derecho di minoria pa controla. Un parlamentario tin cu duna cuenta na pueblo, un presidente di comision tin cu duna cuenta na Parlamento y un mayoria tin cu duna cuenta na e pueblo cu a duna nan e poder.”

MEP ta enfatisa cu no ta bisa cu Aruba ta un dictadura, pero ta adverti cu ora preguntanan no ta wordo contesta, reunionnan ta wordo nenga, informacion ta wordo limita y e ultimo espacio pa control ta wordo kita, nos ta move mas leu for di e principionan democratico cu nos mester proteha.

“Nos no ta pidi privilegio. Nos ta pidi democracia, transparencia y dunamento di cuenta. Pasobra poder sin control ta peligroso. Pero mi kier segura comunidad cu nos lo sigui haci pregunta, nos lo sigui controla y nos lo sigui haci nos trabou pa sirbi pueblo.”

FUENTE: PARTIDO MEP ARUBA/LIVE99FM