SIFRANAN PRELIMINAR: BONEIRU A YAMA BON BINÍ NA 15.984 BISHITANTE STAYOVER DEN LUNA DI YÜLI 2026   

Kralendijk (11 di ougùstùs 2026) – Tourism Corporation Bonaire (TCB) a kompartí informashon turístiko preliminar pa luna di yüli 2026, for di kua ta resultá ku Boneiru a risibí 15.984 bishitante stayover. Esaki ta un bahada di 4% kompará ku luna di yüli 2025, ora ku 16.653 bishitante a yega nos isla.

E bishitantenan for di Hulanda a forma e grupo di mas grandi, representando 47,4% di e kantidat total di yegada ku 7574 bishitante. E bishitantenan for di Merka tabata e di dos grupo mas grandi, representando 25,3% di e yegadanan ku 4044 bishitante.

En total 1911 bishitante (12%) for di Kòrsou a bishitá nos isla, siguí pa Bélgika ku 268 bishitante (1,7%), Aruba ku 247 bishitante (1,5%), Alemania ku 231 bishitante (1,4%), Suisa ku 206 bishitante (1,3%), Brazil ku 166 bishitante (1%), Colombia ku 156 bishitante (1%),  Argentina ku 153 bishitante (1%) i Canada ku 105 bishitante (0,7%).

Mayoria di e bishitantenan for di Merka a biaha ku un partner, siguí pa esunnan ku a biaha nan so. Mayoria a bini pa vakansi (52,7%), pa sambuyá (40,9%) i pa bishitá amigu i famia (3,4%). Mayoria di nan a hospedá den un hotèl (52,7%), un vila (14%), un apartamento (7,9%), nan propio bibienda (5,6%) òf serka un miembro di famia (4,6%). E bishitantenan for di Merka a bini prinsipalmente for di Texas, Florida, Pennsylvania, California, i Virginia. E repartishon di edat ta mustra ku e biaheronan di 45 pa 54 aña a representá 20,2% di e bishitantenan, miéntras ku esunnan di 55 pa 64 aña a representá 19% di e bishitantenan.

E bishitantenan for di Hulanda a konsistí prinsipalmente di famia ku yu, siguí pa esunnan ku a biaha nan so. Mayoria bishitante a bini pa vakansi (77,2%), pa bishitá amigu i famia (8,3%) i pa negoshi (4,2%). Mayoria di e bishitantenan a hospedá den un hotèl (46,2%), siguí pa un apartamento (15,6%), den un vila (11%), serka un miembro di famia (10,8%),  i den nan propio bibienda (5%). Mayoria di e bishitantenan hulandes a bini for di Noord-Holland, Zuid-Holland, Noord-Brabant, Gelderland i Utrecht, kaminda e grupo di edat di 45 pa 54 aña (21,3%) i esun bou di 13 aña (15,2%) tabata e segmentonan di mas grandi.

Pa mas detaye tokante Boneiru su prestashonnan turístiko, bo por bishitá www.bonaireisland.com òf bo por tuma kontakto ku nos via email na info@bonaireisland.com.

FUENTE:TCB/LIVE99FM