SIMAN DI EDUKASHON FINANSIERO 2026

Kralendijk,- E siman di 18 te ku 24 di oktober 2026, lo tuma lugá un Siman di Edukashon Finansiero na Boneiru. Lema di e siman ta “Kreando e Boneriano finansieramente fuerte – Samen bouwen aan de financieel weerbaare Bonaireaan”. Fundashon Perspektiva huntu ku Skohe ta organisando un siman kaminda e aksento lo ta poné riba enpoderá hende riba manera pa anda ku nan finansas den un periodo kaminda kosto di bida ta sigui subi. E intenshon ta pa

durante un siman ofresé habitanten, organisashonnan, profesionalnan i ekspertonan rondó di edukashon finansiero diferente forma di konsientisashon, kompartimentu di konosementu i fortalesimentu finansiero.

Riba kada dia di e siman lo tin aktividat pa diferente grupo di edat por ehèmpel pa e mucha ku ta bai skol básiko, hóbennan, personanan ku ta traha, profesionalnan i e komunidat en general. E siman lo sera ku e Marshe Finansiero riba djabièrnè 23 di oktober, kaminda enkuentro, informashon i konekshon ta sentral. Durante e marshe finansiero tin posibilidat pa huntu mustra kiko Boneiru tin pa ofresé riba e área di edukashon i ayudo finansiero.

Pa e Marshe Finansiero nos ta invitá instituto i organisashonnan ku ta traha o brinda servisio riba e área di edukashon finansiero, servisio finansiero, guia, prevenshon òf otro servisio pa sostené e situashon finansiero di hende pa nan inskribí pa partisipá ku un “mesa di informashon” na e marshe finansiero.

E Marshe ta duna organisashonnan e oportunidat pa presentá nan konosementu, servisio i aktividatnan direktamente na e komunidat, i mesora kontribuí na un diálogo mas ámplio riba fortalesimentu finansiero. Nos ta kere ku tin hopi konosementu i sosten balioso kaba na Boneiru. Úniko situashon ta ku

hopi no ta konosí. E meta di e marshe finansiero ta pa hasi e servisionan i organisashonnan aki visibel i konosí. Tambe pa yuda habitantenan haña mihó informashon i alabes konektá organisashonnan ku otro. Organisashonnan ku ta interesá pa partisipá ku mesa di informashon dia 23 di òktober 2026 durante e Marshe Finansiero 2026 por registrá via:info.fundashonperspektiva@gmail.com

Por fabor manda e nòmber di bo organisashon, nòmber di e persona di kontakto i un deskripshon kòrtiku di bo serviso òf ekspertisio. Huntu nos por pone atenshon na edukashon finansiero i hasi’e mas visibel i aksesibel. Dunando asina aporte na krea e Boneriano finansieramente mas fuerte !