PA BASTA TEMPU A BIN TA SPLIKA GOBERNASHON LOKAL KU E MESTER AKTUA PA NOS POR TENE E KALIDAT DI BIDA NA BONEIRU NA UN NIVEL AKSEPTABEL I RASONABEL.

HEI , ABO TRAHADÓ, BO KONOSÉ BO DERECHO ?

Kralendijk,- Esei ta nifiká ku gobernashon lokal mester kontribui dentro di su responsabilidat na seguridat di eksistensia di su poblashon.

Un di e kontribushon balioso den esaki ta yuda tene e gastunan di e poblashon abou. No tin sentido pa na un banda ta lucha i logra pa alsa e entrada di e poblashon i e klase trahadó di moda ku ta garantisá e minimo na entrada, pero na e otro un banda e kranchi ta keda habrí pa loke ta gastunan di bida, manera hür di kas, kuenta di koriente i awa, kuminda i gastunan personal en general, tranporte públiko, ets.

Un di e medidanan hopi adekuá ku gobernashon lokal tin komo parti di su outoridat i responsabilidat ta entrodukshon di transporte públiko, simplemente den boka di pueblo bùsnan di transporte.

Kon e transporte públiko riba Boneiru ta awor?

No tin sistema di bus figo; No tin horario figo. No tin ruta figo. No tin parada di bùs figo. Pa e motibu aki esnan mas vulnerabel den nos komunidat entre kual tin e klase trahadó i su famia ta pasa problema pa move riba nos isla.

Bisando esaki no ta nifiká  ku no tin transporte ètòl. Nos konosé e bùsnan privá pero ku no ta figo, nos konosé taksi pero ku un tarifa muchu haltu pa pueblo i nos konosé hende ku ta yuda den transporte informal pero ku no ta figo.

Dor di e situashon aki e komunidat ta sinti entre otro ku hende grandi no por bai hasi su diligensianan fásil, bishitanan sosial ta muchu karu, ets.

Pueblo pa solushoná esaki hopi biaha ta hasi fiansa pa kumpra un outo ku e konsekuensia ku gastunan pa luna a subi en bes di baha i ta krea debe. Simplemente bisá “Boneiru ta krese, pero transporte públiko no a krese ku e poblashon.”

“Sin bùs, hende ku no tin ta keda atras.” “Transporte públiko no ta un luho; e ta un nesesidat.”

Den e AKUERDO DI KRALENDIJK e nesesidat aki a keda deskribí hopi kla i a forma parti di e pakete di medidanan pa bringa pobresa riba nos isla. 5 aña despues, apesar ku Entidat Publiko a risibí supsidio for di Hulanda segun e sekretario di estado tantu un biaha komo strukturalmente tur aña, ainda pueblo di Boneiru no tin un transporte públiko.

Parse ku ta trese un  kantidat di argumentu no relevante pa no entrodusi transporte públiko. E ironia ta ku ora turistanan yega nos isla, nan si tin tur sorto di transporte públiko pa sirbi nan nesesidat di move riba e isla i pa nos mes nada.

E otro batata kayente riba mesa ta toka gobièrnu Hulandes. I aki ta trata di e famoso “Comply or Explain”, den bon  papiamentu kumpli o splika.

E mihó manera pa splika esaki ta e entrodukshon di 36 ora di trabou pa siman. “Na Hulanda bo ta traha 36 ora pa haña un sueldo pa por biba. Na Boneiru bo ta traha 40 ora pa mes kos. Si nos ta parti di Hulanda, protekshon mester ta igual.

Si mes regla ta diferente, protekshon no por keda mas abou.” Ku entrodukshon di e prinsipio di KUMPLI O SPLIKA,  nos i Hulanda mester perkurá ku no ta trata nos trahadónan komo siudadanonan di segunda rango, pues nos no mester permití ku ta deskriminá nos i ta trata nos desigual.

Artikulo 1 di nos konstitushon ta obligá Hulanda pa ofresé i duna nos igual protekshon den derechonan, pero ta rekonosé alabes ku nos tin un propio posishon(artikulo 132a). Ta p’esei nos por adaptá legislashon na e realdiat lokal.

Na Hulanda bo ta traha 36 ora pa haña un sueldo pa por biba. Na Boneiru bo ta traha 40 ora pa mes kos. Si nos ta parti di Hulanda, protekshon mester ta igual. Si regla ta diferente, protekshon no por keda mas abou.

12 di yüni 2023 nos pueblo bou di liderato di sindikalismo a subi kaya den un manifestashon pasífiko i nos a eksigí DIFERENSHA SI, DESKRIMINASHON NO.

Awe 3 aña despues sindikalismo mester bolbe hasi un yamada na pueblo pa prepará pa e siguiente bataya i esei ta entrodukshon di 36 ora di trabou pa siman.

Nos trahadónan aki na Boneiru meresé e mesun protekshon ku esnan na Hulanda. No ta negoshá e prinsipio di igualdat. Sindikalismo real no mag ni no por hasi manera Ezau den e storia bibliko a hasi, esta entregá su derecho di primogénito pa un tayó di bonchi.

E lema pa siman trahadóorganisá den sindikato ta segurá bo derecho sin kibra kapitalismo. Bo ta miembro kaba òf bo ta skohe pa sigui biba den loke bo ta awor. Eskoho ta dibo.

FUENTE: NORWIN NÒCHI WILLEM/LIVE99FM