FWNB TA ATVERTÍ KONTRA ESTAFA  NINGUN INSTANSIA NI FUNDASHON WEGA DI NUMBER BONAIRE TAMPOKO POR GARANTISÁ BO KU BO TA GANA NUMBER.

Kralendijk, Fundashon Wega di Number Bonaire (FWNB) ta hasi apelashon na tur siudadano ku ta gusta purba nan suerte kumprando number, pa no reakshoná riba un aviso na spañó ku ta sali riba página di Facebook, den kua ta garantisá ku bo ta gana number.

Wega di number ta un wega di suèrtè, kaminda kasualidat ta determiná ku un hungadó ta gana premio. No ta eksistí un manera táktiko pa gana number. “Suerte” ta hunga un ròl dominante. Ni FWNB, ni e hungadó òf kualkier otro instansia no tin influensia riba resultado di un sorteo p’esei no por garantisá bo ku bo ta gana.

Komprobante di pago(bòn) ku number ganadó di un dia anterior riba dje ku e estafadó ta usa riba su paginá di Facebook óf ta manda via app no ta prosedente di FWNB. Na momentu ku e estafadó ta na altura di resultado di e sorteo e ta traha un bòn falsu usando logo di FWNB. Pa bo ta den wega bo mester tin bo komprobante di pago (bòn) promé ku e sorteo.

No ta eksistí un instansia legal di loteria ku ta duna bo un bòn despues di sorteo anto pa kasualidat ku premio riba dje.

Nunka un instansia legal di loteria no ta pidi pa depositá suma di sèn grandi riba su kuenta di banko promé ku e paga sèn di premio. Un instansia legal di loteria ta depositá e sèn di premio riba kuenta di kliente i ta paga  tur gastu di banko.

FWNB ta advertí tur su klientenan i henter komunidat di Boneiru ku ke purba nan suerte kumprando number, pa no reakshoná riba e tipo di avisonan aki ku ta sali riba paginá di Facebook.

Si enbèrdat bo ke purba bo suerte kumprando number, tin 26 punto di benta di number legal rònt Boneiru.

Na momentu ku bo kumpra number bo ta risibí bo komprobante di pago (bòn). Tur dia tin Sorteo di Wega di Number Bonaire i Wega di Number Kòrsou ta tuma lugá bibu i bou di vigilansia.

Si e number ku a sali den e sorteo ta kuadra ku loke bo tin riba bo bòn, bo a gana i e siguiente dia bo por pasa na ofisina di Fundashon Wega di Number Bonaire pa bo kobra bo premio. FWNB ta garantisá ku bo ta kobra bo premio.

FUENTE: FWNB/LIVE99FM