DEN E SIMAN TRAS DI LOMBA SINDIKALISMO A SINTA KU DOS ORGANISASHON FOR DI ULANDA.

Kralendijk,- Di sumamente importansia pa nos merkado laboral aki na Boneiru. Ta trata di e komishon kontra diskriminashon i rasimo en general i kon esaki ta manifestá su mes na Boneiru en general i riba e merkado laboral en partikular.

E komishon aki ta kai direktamente bou di ministerio di asuntunan interior i di asuntunan di reino. Tambe nos a risibí bishita di dos profesor ku riba enkargo di ministerio di asuntunan sosial i di labor a bin hasi un inventarisashon di e problemanan ku ta tuma lugá riba nos merkado laboral.

Sindikalismo a mustra riba diferente puntonan di desigualdat riba merkado laboral pa loke ta derechonan laboral pero tambe pa loke ta leinan laboral den nos kódigo sivil. Nos a mustra riba entre otro kompensashon di vakashon ku aki na Boneiru ainda nos mester negoshá den CAO,miéntras ku na Ulanda e ta ankrá den lei, esta tur trahadó tin derecho riba un “vakantieuitkering” di 8% di su salario bruto pa aña. Aki komo e no ta lei dunadónan di trabou no ta pag’é òf ta pag’é den e forma ku nan kier. Hasta aña pasá nos a haña dunadó di trabou ku a kita e vakantieuitkering, ku pa años e trahadó tabata risibí, por kompleto.

Nos a mustra riba e abusonan ku ta tuma lugá ku “contractnan voor bepaalde tijd, oproepcontracten i nul-uren contract”. Tambe a mustra ku ainda na Boneiru nos no a yega pa sera CAO-nan pa sektor, ku eksepshon di sektor públiko i sektor di kuido.

Tambe nos a mustra ku a yega ora pa apliká e lei di “verbindend verklaring” di CAO-nan, di moda ku nos por garantisá tur trahadó den sierto sektor kondishonnan laboral básiko, digno i na drechi. Tambe a subi mesa entrodukshon di penshun general, kaminda sindikalismo lo preferá pa esaki bai riba un base di konsulta entre dunadó di trabou i sindikalismo, pero ku si esaki no logra lo mester konsiderá pa bin ku e penshun general a base di lei.

Pa por realisá esaki a pidi pa konsiderá ku por laga kompanianan di seguro di penshun ku ta operá na Ulanda tambe manda oferta na islanan BES tambe. Esaki debí ku nos a konstatá ku e gastunan pa e fondonan di penshun lokal manera entre otro PCN debí na e eskala chikí, ta hopi haltu. Esaki tin komo konsekuensia ku e prima di e penshun tambe ta haltu, miéntras ku loke e ta rindi na final no ta gran kos. Un punto di atenshon ta naturalmente pa nos perkurá pa nos hendenan vulnerabel i e klase trahadó no kai den pobresa atrobe pa motibu di medidanan ku ta tuma inkontrolá.

Te awe ningun instansha no por produsí sifranan konkreto kiko tabata e impakto di e oumento di e sueldo minimo riba operason di kompanianan. Kompanianan ku ta grita ku nan no por paga e sueldo minimo òf ta keda sin pag’é òf ta pag’é lat òf ta pag’é na pida pida te awe no a sali ku sifras pa demonstrá esaki. Pues e konklushon no por ta otro ku ta malusá oumento di sueldo minimo komo kapa pa maltratá trahadó.

Tambe sindikalismo a trese dilanti ku nos mester bai na re-entrodusí diferente kategoria di sueldo minimo. Atrobe nos a konstatá ku ta hasi maluso di e sistema aktual. Tin dunadó di trabou sigur den sektor di konstrukshon ku no ta hasi distinkshon entre piòn i hòmber di fishi ku diploma. Nan ta paga tur dos e mesun sueldo minimo preskribí pa lei.

Esaki ta un di e motibunan ku tin e kritika ku e imigrante ta traha mas barata. Tambe a bolbe enfatisá e tratamentu inhumano i kontra derechonan humano ku ta apliká kontra e trahadó imigrante. Nos a para ketu na e echo ku 52% di nos klase trahadó no ta disponé di un estudio terminá ku un diploma òf sertifikado kual ta opstakulisá nan pa krese den un kompania. Esaki ta okashoná ku nan no ta haña oumento di nan salario.

Den tur e kònbersashonnan aki a sobresali ku Boneiru a krese, Boneiru a prosperá, pero ku e prosperidat no a yega serka e boneriano i ku ta reina un desigualdat sosial grandi  i ku si no tuma e medidanan apropiá esaki lo por empeorá ku tur e konsekuensianan ferfelo ku e ta trese kuné.

Pues a bati e bèl na ora, tin rapòrtnan ku ta sostené e situashon deskribí, pues ta ora pa partnernan ku ta karga nos desaroyo sosial ekonómiko bin huntu pa atendé e tema aki ku tur seriedat.

FUENTE: NÒCHI WILLEM/LIVE99FM