Kralendijk,- Ku sierto sorpresa a tuma nota ku konseho insular di Boneiru a deklará ku e konseho ta konsiderá e representante di Reino interino komo un ‘kolegio ehekutivo interino’.
Konseho Insular ta kere ku e tin derechi di éksihí di representante di Reino interino pa presentá den reunionnan di konseho insular riba yamada. Esaki ta bisto for di un karta fechá 27 di novèmber 2024 ku e grifir a manda pa e representante di Reino na nòmber di konseho insular.
Promé ku kuminsá mester remarká ku e análisís aki di ningun manera ta destiná pa defendé òf legitimá e akshonnan di e representante di Reino interino.
E meta ta únikamente pa promové bon gobernashon dor di mustra riba ehekushon i interpretashon korekto di lei i regulashonnan, ku ta krusial pa funshonamentu di demokrasia lokal, outonomia i garantia di servisio efektivo na e pueblo di Boneiru.
Den e di dos paragraf di e karta menshoná anteriormente, artíkulo 176, promé insiso, di WolBES ta wòrdu sitá pa manda un konvokashon, i no un invitashon, pa e representante di Reino interino, pa bin duna kuenta den su kapasidat di ‘ta na lugá di kolegio ehekutivo’ tokante e tema di Selibon i e landfill na Lagún. Segun konseho insular, ‘ta na lugá di kolegio ehekutivo’ no ta definí mas aleu i komo tal ta un tarea ehekutivo ku ta enserá duna responsabilidat na Konseho Insular.
Promé, e referensia na artíkulo 176, insiso 1 di WolBES den e karta di e grifir na nòmber di konseho insular na e representante di Reino interino ta inkorekto. Artíkulo 176 di WolBES ta relashoná ku supervishon di reunionnan públiko i kosnan asina dor di gezaghèber. Den su karta di dia 13 di novèmber 2024, e representante di Reino interino ta konkluí ku tabatin un negligensia di tareanan i ta indiká ku e tin intenshon di tuma diferente desishon adelantá na nòmber di kolegio ehekutivo a base di artíkulo 231 di WolBES ku ta e artíkulo korekto.
Na di dos lugá, ta remarkabel ku e grifir, ku ta un hurista, ta konsehá un ponensia asina, ku ta demostrá un aserkamentu ‘ku bista korto’ i un falta di substansiamentu hurídiko profundo. E tarea di e grifir hustamente ta pa protehá e konseho, e presidente di e konseho, i e frakshonnan di esaki i e tin e deber di aktua denter di e límitenan di lei.
E representante di Reino interino no mester hustifiká su mes serka konseho insular den kaso di negligensia di tareanan dor di e entidat públiko. Su ròl i responsabilidat ta sintá serka e gobièrnu nashonal i no serka e gobièrnu lokal. Den kaso di negligensia di tarea e representante di Reino por tuma akshon, por ehèmpel, dor di tuma desishonnan ku en realidat ta responsabilidat di e gobièrnu lokal, manera ta e kaso pa ku Selibon i e lentfel na Lagún. Esaki ta keda hasí den nomber di e minister di Interior y Relashonnan di Reino (BZK). E base hurídiko pa esaki ta sintá den artíkulo 211 di WOLBES.
Pa loke ta trata responsabilisashon, e representante di Reino ta hasi esaki serka e minister di Interior y Relashonnan di Reino. E no ta responsabilisá serka konseho insular pasobra e ta fungi komo supervisor di parti di e gobièrnu di Hulanda i no di parti di gobièrnu lokal. Si mira e kontestanan por eskrito di Komishon Fiho pa Asuntunan Hulandes Antiano i Arubano di dia 15 di yanüari 2010 tokante vários lei di e entidatnan públiko Boneiru i St. Eustatius i Saba, ta bin topa ku e pregunta di señora Ortega-Martijn riba página 10, ku ta ‘dikon e Representante di Reino no ta duna kuenta na Konseho Insular?’.
E kontesta tabata lo siguiente:
E representante di Reino no ta pertenesé na e gobièrnu di e entidat públiko. E podernan di e Representante di Reino ta sintá prinsipalmente den e esfera di supervishon, ku e meta pa garantisá bon gobernashon riba e islanan. En bista di esaki, no ta na su lugá pa e representante di Reino duna kuenta na konseho insular. Al fin i al kabo, e ta ehersé un tarea di supervishon pa loke ta trata e entidatnan públiko. Responsabilidat ta enserá un relashon di konfiansa i esaki no ta eksistí entre konseho insular i e representante di Reino. Komo supervisor atministrativo e representante di Reino mester ta independiente di e entidatnan públiko.
P’esei Konseho Insular no tin kontrol direkto riba e representante di Reino. Konseho insular por trese e asuntu dilanti serka e minister di Interior i Relashonnan di Reino, bou di kua e representante di Reino ta kai, òf ehersé preshon polítiko dor di hasi pregunta i eksigí responsabilidat di kolegio ehekutivo tokante e kousanan di negligensia di tareanan.
Tumando na kuenta tur esaki por konkluí ku konseho insular i kolegio ehekutivo ta manera buskando un konfrontashon. Sinembargo, e WolBES ta enfoká esensia riba koperashon i no konfrontashon. E lei ta un base hurídiko ku ta regla e struktura atministrativo, responsabilidatnan i supervishon di e entidatnan públiko di Boneiru, Sint Eustatius i Saba dentro di e konstelashon hulandes.
Kolaborashon entre Hulanda i entidatnan públiko ta sentral, ku e meta pa garantisá bon gobernashon, outonomia i servisio efektivo na e pueblo di Boneiru. Sinembargo, te ainda no tin kontesta riba e siguiente pregunta: dikon konseho insular i kolegio ehekutivo ta buskando konfrontashon i no kolaborashon?
FUENTE: WILLEM A. CECILIA/LIVE99FM

GIPHY App Key not set. Please check settings