TUR KOS TA KLA PA APERTURA DI TEMPORADA DI KARNAVAL 2027!

Kralendijk,- Ku hopi entusiasmo i energia positivo, Komishon Karnaval Boneiru VIBRA ta anunsía ku tur preparashon ta den su fase final pa duna e señal di salida ofisial di temporada di Karnaval 2027, riba djarason 11 di november 2026.

Banda di un temporada yen di koló, ritmo, kultura i alegria, Komishon Karnaval Boneiru VIBRA ta prepará pa trese un Karnaval kaminda union, tradishon i partisipashon di nos komunidat ta sentral. Bou di nos lema “Nos Kultura – Nos Fiesta – Nos Karnaval”, e komishon ta komprometé pa sigui fortalesé nos Karnaval, konservá nos tradishonnan i duna tur hende e oportunidat pa forma parti na un di e selebrashonnan mas grandi di nos isla.

APERTURA OFISIAL – 11 DI NOVEMBER 2026

Lokashon: Patio di SKAL

Dia 11 di november, entre 6or atardi pa 10or di anochi, nos lo duna e komienso ofisial di temporada di Karnaval 2027.

E apertura aki ta marka e promé paso di un temporada ku ta primintí hopi entusiasmo, kolaborashon i momentunan inolvidabel.

E programa di e anochi lo ta dividí den dos parti:

7or pa 8or di anochi – Apertura Ofisial di Karnaval 2027

Durante e apertura ofisial, Komishon Karnaval Boneiru VIBRA lo revelá e lema ofisial di Karnaval 2027, ku lo representá e espíritu, kultura i energia di nos Karnaval pa e temporada benidero.

 8or pa 10or di anochi – Inskripshon pa Festival di Tumba 2027

Despues di e apertura ofisial, lo tuma lugá e inskripshon pa Festival di Tumba 2027. Nos ta invitá tur kompositor, kantante i persona interesá den partisipashon na Festival di Tumba pa hasi uso di e oportunidat aki pa inskribí nan mes.

PROMÉ JUMP-UP DI KARNAVAL – “SINTI E VIBRA, BAN KAYA!”

E fiesta no ta para ei!

Riba djasabra 14 di november 2026, pa 7or di anochi, Komishon Karnaval Boneiru

VIBRA lo organisá e promé Jump-up di Karnaval bou di e lema:

“SINTI E VIBRA, BAN KAYA!”

Ku e jump-up aki nos ke trese e ambiente di Karnaval bèk den kaya, yen di alegria, músika i energia positivo.

E Jump-up lo kuminsa for di stadion di playa Kaya Betico Croes I lo terminá den Kura di TELBO, kaya Libertador Simon Bolivar kaminda e fiesta lo kontinuá ku presentashon di agrupashon musikal, pa pone henter Boneiru sinti e VIBRA di Karnaval! Pronto lo duna mas informashon.

Komishon Karnaval Boneiru VIBRA ta hasi un yamada speshal na tur grupo di Karnaval pa inskribí nan mes pa partisipá den e promé jump-up aki. Naturalmente, henter pueblo di Boneiru tambe ta kordialmente bonbiní.

Komishon Karnaval Boneiru VIBRA, ta invitá tur grupo pa uni ku nos, pa asina nos por traha huntu riba un apertura bunita, alegre i memorabel pa e temporada di Karnaval 2027.

Mas grupo, mas koló, mas energia i mas VIBRA!

Komishon Karnaval Boneiru VIBRA ta gradisí tur grupo di Karnaval, artista, músiko, voluntario, partner, sponsor i tur persona ku ta kontribuí na e preparashonnan di nos fiesta.

Aunke e komishon a asumí e reto di organisá Karnaval 2027 den un periodo relativamente kortiku, ku determinashon, trabou duro i kolaborashon nos ta sigui dilanti pa hasi e temporada aki un éksito.

Nos ta hasi un yamada na henter komunidat di Boneiru pa uni, sostené i partisipá aktivamente den e diferente aktividatnan ku lo forma parti di Karnaval 2027.

E energia ta subi, e ritmo ta kuminsá i nos ta sinti e VIBRA di Karnaval kaba!

 11 di november nos ta ranka sali!

14 di november – SINTI E VIBRA, BAN KAYA!

VIBRA Nos Kultura – Nos Fiesta – Nos Karnaval

FUENTE: KOMISHON KARNAVAL BONEIRU/LIVE99FM