PRONTO INSTITUTO DI IDIOMA PA BONEIRU

Kralendijk,- Direktiva di Fundashon Akademia Papiamentu a tuma nota, pa medio di un komunikado, ku Entidat Públiko Boneiru ta dal e paso pa lanta Instituto di Idioma pa Boneiru.

Fundashon Akademia Papiamentu tin komo meta pa promové, fortifiká i protehá idioma papiamentu riba tur tereno. Nos ta aploudí e paso importante akí di Entidat Públiko Boneiru i ta spera ku pa mas tardá yüni 2027 e instituto bira realidat.

E instituto akí por kontribuí na realisashon di e ambishon stipulá den akuerdonan intergubernamental pa papiamentu na Boneiru. E ambishon stipulá ta ku for di 2030 tur mucha ku bandoná skol por lesa i skirbi na papiamentu.

Huntu ku Entidat Públiko Boneiru, Fundashon Akademia Papiamentu tambe ta rekonosé ku papiamentu ta e idioma ku ta uni e hendenan ku ta biba na Boneiru, sin importá di unda nan a bin.

FUENTE: FUNDASHON AKADEMIA PAPIAMENTU/LIVE99FM