SI BO TA DESEÁ RÈSPÈT, BO MESTER DUNA RÈSPÈT PROMÉ!

Mi motivashon ta pa konsientisá den un forma hustu sin manipulashon.

Hasiendo uso di mi derecho di ekspreshon komo un suidadano ku ta kere den bienestar mental di nos komunidat. Odio no por eksistí den mi kurason pa ningun hende ku mester risibí informashon korekto ainda. Pa bo por skohe bo mester di opshonnan. Asina ku informashon ta destiná pa bo aseptá sin kuestioná bo ta wòrdu manipulá.

Artíkulo riba media sosial

Mi a tuma nota di un artíkulo ariba medio sosial titulá ‘pride week ta dediká na rèspèt, inklushon i union. I komo un yu di Dios ku a kometé hopi erornan i a siña di nan, un persona ku a lanta eduká den prinsipionan moral sano i ku ta kere den loke ta korekto no por keda ketu ora ku mi lesa tipo di artíkulonan asina aki. Bunita eskoho di palabra usá di tal forma pa duna un impreshon ku tur hende ku ta kere òf ku sa ku ta dos tipo di serhumano ta eksistí esta hende hòmber i hende muhé ta robes. Di akuerdo, un hende por imaginá su mes di ta yen di otro kos, pero esei ta bisa mas di su imaginashon i su estado mental i no loke ku realidat ta prueba.

Nos mester kòrda ku algun kos legalmente korekto no ta moralmente korekto.

Legalidat y moralidat no ta semper meskos.

Ser humano mester huzga akshonnnan pa medio di konsenshi komo tambe pa medio di reglanan.

Pasobra leinan por pèrmití akshonnan ku ta dañino òf inhustu. P’esei sabiduria ta wak mas leu ku legalidat i ta hasi preguntanan mas profundo tokante loke ta bon i loke ta malu. Un sosiedat hustu no ta dependé solamente di leinan, pero tambe di kurashi moral i reflekshon étiko.

E tata di mentira

E artíkulo ta bisa ku “Luna di yüni ta dediká rònt mundu na inklushon, igualdat i rèspèt pa hende”. Si esaki ta referí na e selebrashon di Pride ta un mentira. Pasobra rònt mundu no ta selebrá esaki. Pami menshoná algun, gran parti di Afrika, Medio Oriente, China, Rusia ni tampoko na El Salvador aki den nos kontinente entre otronan no ta partisipá na e selebrashon aki. I te asta na Merka weganan di beisball a para dia 19 di yuni 2026 pa motibu ku hungadornan a nenga di wòrdu obligá pa representá algu ku nan no ta aseptá i ku ta bai kontra prinsipionan natural.

Palabra di Dios ta eduká nos ku satanas e enemigu di nos alma ta un mentiroso. Su propósito ta pa mata, hòrta i destruí, i na promé lugá bo identidat. E e strategia ku e ta usa ta di kontradusí tur loke tur loke ku ta bèrdat i korekto pa asina trese duda i konfushon. Pasobra ora bo mente ta den duda i konfushon ta fásil pa bo keda manipulá i dirigí pa tur tipo di ideologia eroneo. Nos komo hende ta krea ku un boluntat propio. Nos ta skohe konsiente of inkonsientemente pa laga bèrdat òf mentira influensiá nos. Ta pesei ta hopi importante pa for di chikitu un mucha keda eduká ku berdat. I e enemigu di nos alma sa esei i pései tambe nos ta konsiente ku na varios paisnan na mundu e ideologia eroneo aki a keda implementá na skolnan primaria. Pasobra manera palabra di Dios ta bisa, loke bo siña un mucha for di chikí sea bon of malu ora e krese ta esei e ta bai hasi.

‘Un yamada pa konekshon, solidaridat i rèspèt pa otro.’

Esaki segun e artíkulo ta e tema di Pride e aña aki na Boneiru. Realidat ta ku no ta tur kos bo por uni.

Tampoko bo no por konektá tur kos. Bo no por konektá bèrdat ku mentira entre otro. 

Bo no por sostené algu ku bo sa ku no ta funda ariba bèrdat kaminda tin tur e evidensianan pa prueba di loke si ta korekto. Mentira no ta kos ku bo mester respetá bo mester enfrentá esaki ku bèrdat. Keda ketu i tolerá mentira ta hasi abo komplisé di e mentira ei tambe, sea bo ta polítiko of lider spiritual (pastor).

Den e artíkulo aki ta keda bisa ku ‘Kolegio Ehekutivo di EPB ta enfatisá importansia di un sosiedat kaminda tur hende por sinti nan mes bon biní, sigur i respetá. Boneiru ta un komunidat kaminda hende di diferente desesndensia, konvikshon i manera di biba ta biba huntu. Hustamente e diversidat ei ta hasi nos fuerte.’

Mi no sa ken a skirbi e artíkulo aki, pero klaramente ta un persona ku no ta konsiente di kon realidat ta funshoná, pero simplemente ta ekspresá di imaginashon formá di tantu informashonnan i ideologianan eroneo ku ta bai rònt awendia tur kaminda. Dikon?

Mi ke enfatisá riba e frase aki, ‘Hustamente e diversidat ei ta hasi nos fuerte.’ Esaki no ta bèrdat. Ora bo ta fuerte ta ora ku realmente bo ta uní riba un liña di pensamentu di akuerdo ku otro. Tin rèspèt pa otro i rèspèt pa loke ta realidat, bèrdat i ta korekto. Si abo i un otro persona ta mira i sa ku e muraya ei ta blanku di fèrf, si e otro disidí di kere ku e muraya ei ta kòrá di fèrf algu ta robes den mente di e otro. Pasobra su argumentu no ta kuadra ku e evidensianan visibel. No por tin unidat kaminda tin desunion ni kaminda kier obligá un otro aseptá loke ku no ta real. E no ta bai.

Porehempel, na luna di desèmber 2025 Sentro Akeso Boneiru a saka un video bisando ku famia ta e núkleo di un komunidat. Bèrdat, famia den e órden korekto ku por reprodusí hende i edukanan korektamente ta e núkleo di un komunidat sano. Esta un famia konsistiendo di un hende hòmber i un hende muhé. Awor tur hende sa ku dos hòmber ni dos hende muhe no por reprodusí nada (un yu). Kon bo ta kere ku e eror den pesamentu aki i realidat por uni? E no ta bai! 

Si abo komo mayor ta eduká bo yu na kas ku realidat, bèrdat i e ta bai skol nan ta konfundí su mente ku ideologinan eroneo e sistema ta bruahando e muchanan ei nan mente. I kiko nos mester hasi, keda ketu?

Si esnan ku a skohe pa biba den e eror di pensamentu ei kier haña rèspèt nan mester kuminsa na respetá esnan ku si ta biba konforme órden di realidat.

Nos mayoria aki na Boneiru ta konsiente di realidat i bèrdat ku un hende hòmber i un muhé a keda krea diferente den tur aspekto, pasobra asina nan por kumpli ku e propósito pa kua nan a keda krea pe. Esei ta nos norma i balor. Bo no mester ta kere den Dios pa sa esaki. Awor ta imposibel ku ideologianan eroneo ta drenta aki, falta nos rèspèt antó awor na nòmber di e gobièrnu ku nos komo pueblo ta pone einan pa hasi loke ta korekto pa nos bienestar den tur aspekto di palabra, ta bin bisa nos ku tolerando loke ku nos ta konsiente ku no ta kuadra ku realidat no ta aseptabel, i ku nos mester aseptá ideologianan eróneo te asta den un forma obligatario… i esei ta hasi nos fuerte? Mentira.

Basha awa den biña.

Na momentu ku bo basha awa den biña su balor ta baha. Na momentu ku bo kier obligá un pueblo rechasá su prinsipionan moral pa aseptá ideologianan eróneo ta distruyendo identidat di e komunidat ei.

E artikulo ta sigi bisa, Tur hende meresé pa trata nan ku dignidat i rèspèt, sin importá kolo di kueru, origen, entnisidat, kreensia, sekso of orientashon seksual. Rèspèt pa otro ta forma base di un komunidat solido. I huntu nos ta kontribuí na un sosiedat kaminda rèspèt i union ta para sentral.’

Echo ta ku rèspèt i union nunka por para sentral entre loke ta korekto i loke ta robes. Bo ta respetá e persona komo serhumano i tin kompashon kune pa motibu di su konfushon mental pero e pensamentu inkorekto ku ta bai kontra realidat bo no por respetá, esei bo tin ku enfrenté ku loke ta korekto i bèrdat ku un aktitut di amor berdadero.

Pasobra tolera algu robes ku ta destruí un hende sikikamente, mentalmente i fisikamente no ta amor, amor ta ora bo ta hasi di bo banda pa duna e informashonan nesesario pa e persona ei tin chèns pa pensa i skohe pa su mes kiko e kier hasi. I kada eskoho tin su konsekuensianan. Si realmente bo stima humanidat bo ta konfrontá e persona ei ku e bèrdat den amor. Sin husgé. I ta esaki ta loke ku nos mester tene na kuenta kuné aki na Boneiru.

Nos gobièrnu i esnan ku ta yamanan mes Kristian aki na Boneiru ta mará na man ku pia i bou di menasa di e sistema ku nos ta den aktualmente ku nan no por ekspresá i defendé loke ta realidat i bèrdat mas publikamente, dor di trese edukashon korekto. Tur ta bou di menasa di e ideologinan eroneo aki i leinan ku ta sostené e konfushonan aki i nos komo pueblo mester sinta ketu mira kon nos futuronan di mañan nan mente ta keda korumpí ku informashonnan robes?

Mi no sa si ami ta dispuesto na sinta ketu!!

Nos ta biba den un pais demokrátiko i pueblo ta disidí kiko nan ta aseptá i kiko no. Si ta gobièrnunan tin ku disidí pa obligá un pueblo pa aseptá loke ku ta inkorekto i rechasá loke ta korekto, mi no ta kere ku nos ta bibando den un pais demokrátiko. Si 51% di e poblashon Boneiriano aki uni i disidí pa para pa loke ta korekto mester respetá esei. I niun gobièrnu no por kontradesí esei. Si leinan ta keda implementá riba nos fuera di nos boluntat dor otronan eksterno ta pa motibu ku nos ta kolonisá. E reto ta e ora ei pa bai buska un solushon pa nos risibí e rèspèt ku nos mester pa skohe pa nos mes kon eduká nos futuronan di mayan.

Mensahe pa e autor di artikulo

Mi mensahe pa esun ku a skirbi e artíkulo relashoná ku Pride representado Kolegio Ehekutivo ta pa stòp di hasi eskoho di palabranan i formulá frasenan ku klaramente no ta destiná pa trese loke ta korekto i bèrdat dilanti, pero na fini manera sigi ku e implementamentu i obligá nos komunidat pa rechasá edukashon sano a kambio di edukashon eroneo. E artíkulo aki ta skirbí na nòmber di nos gobièrnu lokal, pero kòrda ku ta pueblo ta pone gobièrnu einan pa sirbi pueblo no boluntat di enstraheronan ariba pueblo su boluntat.

FUENTE: NOËL JOHN JANGA