DIA DI ENFERMERIA NA GGD

Kralendijk,- Den okashon di selebrashon di Dia di Enfermeria, e enfermeranan ku ta traha na Direktora GGD a risibí un momentu meresí di rekonosimentu pa nan dedikashon i sakrifisio.

Durante e aktividat, Tafila Janga, presidente di ABVO, a dirigí palabranan di felisitashon i apresio na tur trahadó, i spesialmente na e miembronan ku ta traha den e área vital di enfermeria.

E presidente a ekspresá su gratitut den un mensahe klaru i sentido:

“Kerido enfermeranan i miembronan di ABVO, Mi ta hopi orguyoso di para aki komo boso representante sindikal. Bosonan ta hasi un trabou importante, yen di sakrifisio i dedikashon. Komo boso sindikato, nos ta boga pa mihó kondishonnan laboral, mas rèspèt i mas apresio pa bosonan komo enfermera. Mi ta komprometé pa sigui lucha pa boso, wak pa boso interes i fortalesé nos union. Huntu nos ta mas fuerte. Huntu nos por yega leu. Masha danki pa boso konfiansa.”

E selebrashon a sirbi komo un momentu pa re-afirmá e balor i importansia di enfermeronan den sistema di kuido i salú, i pa rekonosé nan kontribushon kontinuo na bienestar di komunidat.

FUENTE: ABVO BONAIRE/LIVE99FM