GODSWIN WINKLAAR, TRAHADÓ EKSEPSHONAL A BAI KU PENSHUN“UN TRAHADÓ KU MERESÉ PA KITA SOMBRÉ PE”

Kralendijk–Resientemente Godswin Winklaar, konosí pa Jury, a yega edat di penshun i por bai disfrutá di dje awor meresidamente.

Jury a laborá 39 aña na Panaderia Seruva, empresa di su ruman hòmber mayó; Sergio Winklaar, huntu ku su señora esposa Uvaldina Winklaar-Statia. Jury a drenta Panaderia Seruva komo partidó di pan i alabes a traha komo paketadó di pan i asistente di panadero na prinsipio.

Pero poko tempu despues, el a haña e oportunidat pa a siña e trabou di panadero den su totalidat for di su ruman hòmber i a bin bira un gran maestro den esaki. Manera nan ta bisa; alumno a superá maestro. Asina Jury a fungi hopi aña largu komo e panadero prinsipal di Panaderia Seruva.

Gerensia di Panaderia Seruva ta sumamente agradesido pa e añanan di labor, ku Jury a ehersé na Seruva. Palabranan hamas ta sufisiente pa ekspresá, tal gratitut.

Ku imenso orguyo nan ta rekonosé Jury komo un trahadó eksepshonal; realmente un super bon trahadó ku ta unu di kita sombré. Pues Jury tabata un trahadó ehemplar pa tur ku ta rònt di dje i hopi a siña di dje. E ta e tipo di trahadó di tremendo kondukta laboral ku awendia bo no ta haña fasil.

E tabata un trahadó hopi fiel, sumamente responsabel i totalmente komprometí na su trabou. E tabata semper puntual i tabatin un produktividat inigualabel i insuperabel. Hopi a purba alkansá su rapides den trabou sin nunka a logra. Jury tabata traha manera un mashin i gerensia di Seruva semper a mir’é manera e motor di produkshon di Seruva.

Jury ta e trahadó ku a alkansá mas aña di servisio den Seruva i den su añanan di servisio ku e tabatin na Seruva, e ta e trahadó tambe ku den proporshon, menos a falta trabou pa motibu di malesa òf otro motibunan personal, komparativamente ku tur otro empleado di Seruva.

Gerensia di Seruva semper ta keda kòrda, na momentu ku Jury a kumpli 30 aña den Servisio, por a konta solamente 3 bia ousente serka Jury; 2 bia tabata pa motibu di malesa i 1 bia pasó e mester a biaha ku su yu menor beibi e tempu ei ku urgensia pa Kòrsou pa tratamentu médiko avansá. Pues su ousensianan na trabou tabatin un promedio di 1 bia den 10 aña di trabou, algu ‘nunca visto’. Jury ta bai hasi hopi falta na Seruva.

Gerensia di Seruva ta deseá Jury tur klase di éksito den su etapa di penshun bon meresí. Ku e por disfrutá máksimo di esaki, semper ku e bendishon di Dios. I ku Dios por sigui supla i proveé p’e den tur su nesesidat- i deseonan di kurason.

Potrètnan ta ilustrá momentu ameno ku gerensia di Seruva a sinta ku Jury i su señora esposa na un restorant, serando ofisialmente su etapa di labor na Seruva ku e famoso entrega di ènvelop, mas diskurso di gratitut.

FUENTE: FITTIPALDI PIETERSZ/LIVE99FM