ARUBA: FORTALESÉ KÒNTRÒL RIBA PARTISIPASHONNAN GUBERNAMENTAL

Oranjestad – Kolegio di supervishon finansiero di Aruba (CAft) ta konsiderá ku e intenshon di Aruba pa bira e promé pais den parti karibense di Reino ku ta introdusí polítika kla pa benefisiá maneho di partisipashonnan gubernamental i dividèntnan, ta positivo.

E polítika aki, huntu ku un kódigo di kondukta nobo pa bon gobernashon (corporate governance code) por yuda Aruba pa rekonosé riesgonan finansiero serka kompanianan estatal den un fase mas trempan, i pa saka mas resultado i rendimentu sosial di e kompanianan aki. Konsiderando eksperensianan anterior, den e marko aki CAft ta enfatisá e nesesidat pa efektivamente implementá e polítika aki, i apliká esaki den práktika.

Polítika di partisipashonnan

Kompanianan den kua gobièrnu tin partisipashon, ta importante pa e pais, pero nan tambe ta trese riesgonan finansiero. CAft a presensiá vários ehèmpel di esaki. Serka Aruba Wastewater Sustainable Solutions (AWSS) tabata tin intenshon pa kontratá fiansanan innesesariamente karu, serka Utilities a empleá dividèntnan sin aprobashon di e akshonista, i e finansiamentu i destaho di algun proyekto grandi serka Refineria di Aruba (RdA) a tuma lugá ku kondishonnan desfaborabel. Den kaso di e fiansanan serka AWSS a intervení na tempu, entre otro riba konseho di CAft. P’esei ta importante pa distribuí e ròlnan adekuadamente; Minister di Finansa ta fungi komo propietario na nòmber di Gobièrnu, e sobrá Ministernan ta duna enkargo, i e kompanianan ta ehekutá esakinan. Di e manera aki ta laga kla ken ta responsabel pa kiko.

Aruba ta den proseso di implementá polítika pa e partisipashonnan aki, ku reglanan pa pagonan di dividènt. Banda di esaki, ta traha riba un lei pa bon gobernashon pa medio di e Ordenansa Nashonal Corporate Governance. E markonan aki ta un base fuerte pa mihó maneho di kompanianan estatal, kon tal ku ta implementá esakinan, i ta kumpli ku nan konsistentemente.

Banda di atenshon pa partisipashonnan gubernamental, CAft ta bolbe pidi atenshon spesífiko pa e situashon di Dr. Horacio Oduber Hospital Aruba (HoH), pasobra e gastunan korespondiente na esaki ta kargá pa Gobièrnu, miéntras Gobièrnu no por intervení komo propietario ni akshonista. Akinan tin riesgonan finansiero konsiderabel, i CAft ta urgi Gobièrnu pa yega na un solushon ku hospital i e propietario.

Proyekto di Lei di Reino Finansa Gubernamental Sostenibel Aruba (RHOFA)

Ku RHOFA, Aruba ta enfrentá un eskoho importante. RHOFA i e ordenansa nashonal korespondiente ta ofresé un marko di referensia pa supervishon finansiero, i nan ta generá benefisionan di interes pa Aruba. Ku RHOFA, por refinansiá fiansanan kontratá den eksterior mas barata serka Hulanda, i Aruba por registrá pa fiansanan nobo serka Hulanda pa finansiá invershonnan. Esaki por duna Aruba un benefisio di interes ku ta asendé te AWG 60 mion pa aña. Esaki ta mas ku AWG 500 pa kada arubiano.

Maneho finansiero

CAft ta apresiá e progreso ku Aruba ta hasi respekto di resolushon di e retrasonan den e kuentanan anual. Algemene Rekenkamer Aruba a risibí tur kuenta anual te ku 2024. E informenan tokante di e implementashon di maneho tambe a keda aktualisá. Awor ku a resolvé e retraso, mester kuminsá traha pa oumentá e kalidat di e informenan. Akinan Aruba ta enfrentá retonan konsiderabel.

Riba 26 i 27 di febrüari, CAft a bishitá Aruba. Durante e bishita aki, CAft a papia ku Gobernador, Ministernan di Finansa, Asuntunan Ekonómiko, Hustisia, Integrashon i Transporte Públiko, ku Konseho di Minister, Parlamento di Aruba, Algemene Rekenkamer Aruba i kompanianan manera Utilities i Refineria di Aruba.

FUENTE: CFT/LIVE99FM