Willemstad,- Un bon maneho di organisashon ta indispensabel pa bon trabou polisial, pero den organisashonnan polisial e no ta risibí semper e atenshon ku e ta meresé. Esaki tabata un di e mensahenan sentral di Konferensia di Bedrijfsvoering, ku a tuma lugá na Kòrsou dia 12 i 13 di novèmber.
Kasi 80 empleado i dirigente di kuerponan di polis di Aruba, Kòrsou, Sint Maarten i Hulanda Karibense, i di Recherche Samenwerkingsteam (RST), a partisipá na e konferensia. Tabata di promé biaha ku a organisá un reunion di e tipo aki pa empleadonan di bedrijfsvoering/maneho di negoshi, di e organisashonnan aki. E Kolegio di Hefe di Polis i Plataforma di Hefenan di Bedrijfsvoering Karibe (PHBC) a organisá e konferensia. E meta tabata pa reuní empleadonan di e diferente organisashonnan i traha huntu riba desaroyo di bedrijfsvoering pa e periodo 2027–2030.
E kurason di e organisashon
Durante e apertura, Carl John, presidente di e Kolegio di Hefe di Polis, a yama bedrijfsvoering e kurason di e organisashon polisial. Tras di e trabou polisial ku hende ta mira tin un kantidat grandi di aktividatnan di sosten. Empleadonan di bedrijfsvoering ta sòru, entre otro, pa kontratashon i formashon di personal, maneho di vehíkulonan i edifisionan, sistemanan di ICT ku ta funshoná bon i uso responsabel di rekursonan finansiero.
Pa kuerponan di polis den Karibe, esaki no ta semper fásil. E departamentonan di bedrijfsvoering ta relativamente chikí i mester kumpli ku hopi tarea ku kapasidat limitá. Konosementu spesialisá no ta semper disponibel i empleadonan hopi biaha ta kumpli ku diferente tarea. P’esei, koperashon i kompartimentu di konosementu entre e kuerponan di polis ta importante.
Bedrijfsvoering ta meresé un posishon kompleto den e organisashon
Raymond Ellis, hefe di polis di Kòrsou, a papia durante su seshon di inspirashon tokante e posishon di bedrijfsvoering den polis. El a enfatisá ku mester hasi mihó uso di e konosementu di empleadonan di bedrijfsvoering ora ta tuma desishonnan importante. Por ehèmpel, ampliashon di kapasidat di investigashon tin konsekuensianan pa planifikashon di personal, formashon i fasilidatnan di trabou.
Ellis a ekspresá tambe su apresio pa e empleadonan ku tur dia ta sòru pa e organisashonnan polisial por funshoná. Segun dje, un posishon mas fuerte pa bedrijfsvoering ta eksigí tambe atenshon pa desaroyo profeshonal di e empleadonan aki i oportunidat pa nan aportá nan konosementu i eksperensia na desaroyo di e kuerponan di polis.
Trahando huntu na bedrijfsvoering di 2030
E Plan di Desaroyo di Bedrijfsvoering 2027–2030 tabata sentral durante e konferensia. Den e plan aki a deskribí ocho direkshon di desaroyo pa sigui profeshonalisá bedrijfsvoering, entre otro digitalisashon, personal i kapasidat, i kompra i maneho di kontratnan.
Durante seshonnan di trabou, e partisipantenan a diskutí kua mehorashonnan ta nesesario i na kua tereno e kuerponan por koperá mas, por ehèmpel den kompartimentu di konosementu spesialisá, formashon huntu i interkambio di manera di traha. E mesanan temátiko a duna empleadonan di e mesun área profeshonal oportunidat pa kompartí eksperensianan di nan trabou diario. Pa hopi partisipante, tabata tambe di promé biaha ku nan a topa personalmente ku nan koleganan di otro isla.
Atenshon pa desaroyo profeshonal
Banda di e seshonnan di trabou, e partisipantenan por a sigui masterclassnan tokante inteligensia artifisial (AI), desaroyo personal, bedrijfsvoering den estadonan insular chikí i kon pa trata ku interesnan diferente i resistensia na trabou. E masterclassnan tabata dirigí riba asuntunan práktiko ku empleadonan ta topa den nan trabou. Asina a diskutí kua posibilidatnan AI ta ofresé pa bedrijfsvoering i kon estadonan insular chikí por trata ku nan eskala i kapasidat limitá.
Kontinuashon
E konferensia a produsí ideanan i proposishonnan pa sigui elaborá e Plan di Desaroyo di Bedrijfsvoering 2027–2030. For di e kombersashonnan a resultá ku e departamentonan di bedrijfsvoering di e diferente kuerponan di polis hopi biaha ta enfrentá e mesun problemanan. P’esei, e partisipantenan ta mira posibilidatnan pa siña mas di eksperensianan di otro i a ekspresá e deseo pa organisá un reunion di e tipo aki mas frekuentemente. PHBC lo usa e resultadonan di e konferensia pa sigui elaborá e plan.
FUENTE: KOLEGIO DI HEFENAN DI POLIS/LIVE99FM



GIPHY App Key not set. Please check settings