E PETISHON KU E POSISHON FUERTE DI AFBW A KONVENSÉ GERENSIA PA YAMA DEN FORMA DI URGENSIA TUR STAKEHOLDERS DIA 3 DI SÈPTÈMBER DI E AÑA AKI PA POR A  DUNA UN PRESENTASHON DI E SITUASHON DI  KOMPANIA SELIBON

Kralendijk,- Na e reunion ei a sali e desishon ku mester informá Konseho Insular, kual ta e representashon máksimo di nos isla i kual órgano ta esun ku ta stipulá e maneho i mas importante ainda, tin ku pone e fondonan disponbiel pa por ehekutá e maneho.

E presentashon aki a tuma lugá dia 25 di sèptèmber i lamentablemente e frakshonnan den Konseho Insular no a logra traha e brùg pero a lanta murayanan di separashon haltu entre nan. Nan no por a yega na un akuerdo unánime pa duna un instrukshon kla kompañá ku fondonan na Kolegio Ehekutivo. Mirando esei i ku nos lo por a kai den e mesun storia sin solushon dia 24 di òktober AFBW a konvoká un reunion di tur trahadó den presensia di tur stakeholders inkluso Kolegio Ehekutivo pa nan skucha,

tende direktamente for di e trahadónan mes kon pésimo e situashon ta i ku nan mester aktua, Despues di e reunion ei sindikalismo a para ariba pa Kolegio Ehekutvio i Selibon yega na un akuerdo por eskrito di tur loke a palabrá dilanti e trahadónan i tambe na mesa di Diálogo. Despues ku tur partido na mesa a bai di akuerdo ku esaki a sigui ku konsultanan i awe nos tin un akuerdo firma pa Selibon i Kolegio Ehekutivo riba mesa ku ta kubri garantia pa eksistensia di Selibon pa e por kumpli ku su tareanan públiko, esta di rekohé i prosesá sushi, e lo tin un nul-meting pa asina determina e kostonan operashon i pa adaptá tantu e tarifananan pa rekohé e prosesá sushi pero tambe tarifanan pa e tareanan públiko ku Selibon tin.

I no ménos importante e trahadónan di Selibon ku ta esnan ku a i ta karga Selibon, ku ta esnan ku ketu bai a keda duna servisio na komunidat, ku ta esnan ku a entregá parti di nan kondishonnan laboral pa un aña largu, ku ta esnan ku a sigui traha ku ekiponan peligroso i den edifisionan ku no ta kuadra ku eksigensianan di seguridat, ku ta esnan ku a eksponé pa años nan salú trahando ku sushi peligroso. I un biaha mas sindikalismo a logra su tres R-nan, esta Rèspèt pa e trahadó i su famia, Rekonosementu di e trahadó pa su kumplimentu i Rekompensa hustu pa su labor ku e ta presta. Nan por ta sigur ku AFBW ta bai mesa di negosashon armá ku loke tin den e akuerdo aki i ku e konfiansa ku loke tin skirbi tur stakeholders lo kumpli.

E fundeshi di e negosashonnan lo ta:

1. Mehorashon di provishonnan laboral. E aktual CAO lo keda adaptá di tal forma ku lo mehorá e kondishonnan laboral. Pero tambe mester buska solushon pa e edifisionan i tamnbe e situashon na Lèntfel i Morotin.  Entidat Públiko lo sostené esaki.
2. Lo bin ku un plan di formashon i desaroyo pa e personal den e Selibon Nobo. Esaki tambe por konta ku sosten di  Entidat Públiko.
3. Lo someté tur trahadó pero spesialmente esnan na Lagun i Morotin na un eksamen médiko pa ku nan salú. Sindikalismo aki ta hasi un petishon pa inkluí e eks-trahadónan tambe ku a traha na Lagun i/o Morotin.
4. Tur trahadó lo risibí un prima di apresio pa nan labor, dedikashon i ku apesar di tur kos a sigui duna e komunidat e máksimo na servisio. E prima aki kual lo ta un biaha lo ser pagá den luna di dezèmber 2025 i na yanuari 2026.

Pabien na gerensia, pabien na hunta di komisario, pabien na akshonista, pabien na Kolegio Ehekutivo, pabien na direktiva di AFBW, pabien na e shopstewardnan di Selibon i mas ku tur kos pabien na tur trahadó di Selibon i nan famia ku a para firme i uní tras di nan sindikato un biaha mas pa logra esaki pa komunidat, pa e kompania Selibon i pa boso mes. Antó danki pa un biaha mas kere i a aktua den e lus di e lema di sindikalismo ku traha brùg semper ta mihó ku lanta muraya i ku EL EKIPO SIEMPRE GANA. I pa nos rekordá. Forsa di e Ekipo ta den kada individual ku ta formé i forsa di e individuo ta e Ekipo,

FUENTE: NÒCHI WILLEM/LIVE99FM