BONAIRE HUMAN RIGHTS ORGANIZATION NA E DI 80E ASAMBLEA GENERAL DI NASHONNAN UNI

Kralendijk,- James Finies, lider di Partido Pueblo Progresivo i Uni i fundador di e Organisashon di Derecho Humano di Boneiru (BHRO), ta partisipando e siman aki den e 80e edishon di Asamblea General di e Nashonnan Uni (UNGA) na New York. Durante e reunion históriko aki, lidernan mundial ta reflehá riba e rol di Nashonnan Uni i e responsabilidad kompartí pa krea un sistema multilateral más inklusivo i husto.

Sr Finies a yega New York direktamente for di Ginebra, Suisa kaminda e a partisipá siman pasa na e 78e seshon di Komishon di Nashonan Uni tokante Derechonan Ekónomiko, Sosial i Kultural (CESCR). Pa e promé biaha den historia, un suidadano Boneriano a envolví dirèkto den dialógo ku e ekspertonan di e Komishon, na momento ku riba 16 i 17 Septmber ultimo Hulanda tabata ser kuestioná tokante su kompromisonan di derechonan humano.

E dokumentonan entregá pa delegashon di BHRO a resulta ku témanan importante a wordu formalmente plantea na delegashon Hulandés, eksponiendo violashonnan kontra e pueblo di Boneiru i su islanan-ruman Antiano.

Tambe na Ginebra durante e di 60e seshon di e Konseho di Derecho Humano i eventonan relashona, Sr. Finies a presentá i lobby e kaso di Boneiru. A pone énfasis riba violashonan serio di lei internashonal i di derechonan fundamental pa autodeterminashon, manera ta stipulá den Artíkulo 1 di e Pakto Internashonal riba Derechonan Ekónomiko, Sosial i Kultural (ICESCR) i e Pakto Internashonal riba Derechonan Sivil i Polítiko (ICCPR).

Representando e voz di e pueblo Boneriano sin voz, i komo lider di un organisashon independiènte di derechonan humano, Sr Finies a partisipá na e seremonia ofisial di Nashonan Uni dialuna, 22 di Sèptèmber, markando e di 80 aniversario di kreashon di  Nashonnan Uni.

E kaso di Boneiru a yega awor na e nivel internashonal di mas haltu. Reflektando e prinsipio fundamental di  Nashonan Uni ku “ningun hende no mester keda tras,” Sr Finies a enfatisá ku Boneiru mester wordu inkluí den e dialógo global tokante igualdat, hustisia i e derecho pa autodeterminashon.

Finies a reafrima su yamada pa Nashonnan Uni pone Boneiru riba e lista ofisial di Teritorionan No-Autónomo, ku lo pone e isla bou di supervishon i protekshon di Nashonan Uni. E akshon aki lo forsa Hulanda pa kumplí ku su obligashonnan bou di e Charter di Nashonan Uni dor di reportá na e Asamblea General tokante desaroyo edukativo, sosial, ekonómiko, kultural i polítiko di e pueblo di Boneiru.

E tema di e Asamblea General di e aña aki — “Miho Hunto: 80 Aña I Mas pa Paz, Desaroyo i Derechonan Humano” — ta resalta e prinsipio ku e desaroyonan global di awe por solamente wordu superá dor di koperashon i responsabilidad kompartí. E pilarnan prinsipal di Nashonan Uni — Paz, Desaroyo Sostenibel, i Derechonan Humano — mester guia esfuersonan internashonal pa garantisá libertat, dignidat i hustisia pa tur pueblonan, inkluso esnan ku ahinda ta luchando pa autodeterminashon.

FUENTE: BONAIRE HUMAN RIGHTS ORGANIZATION