BHRO TA EMITI UN AVISO PUBLIKO TOKANTE E KAMPANJA RIBA MEDIA SOSIAL DI E INSTITUTO HULANDES PA DERECHONAN HUMANO

Kralendijk,- Bonaire Human Rights Organization (BHRO) ta manda un alertá públiko despues di lansamentu di un kampaña riba media sosial dor di e Instituto Hulandes pa Derechonan Humano. Nan kampaña tin komo meta pa informá residentenan di Boneiru, Statia i Saba tokante derechonan humano den bida diario, inkluso kosto di bida, bibienda, kuido di salú, enseñansa i otro kondishonnan básiko di bida.

BHRO ta sostené firmemente edukashon tokante derechonan humano. Sin embargo, nos preokupashon prinsipal ta ku e informashon ku ta wordu presentá na públiko mester reflehá korektamente e realidatnan bibá i e violashonnan di derechonan humano ku nos hendenan ta eksperensiá riba nos islanan. P’esei, BHRO ta stimulá residentenan pa evaluá krítikamente e informashon ku ta wordu presentá via e kampaña aki.

E preokupashon aki ta basá riba BHRO su eksperensia direkto durante e revishon di e kumplimentu di Hulanda ku su obligashonnan dor di e Komité di Nashonnan Uni pa Derechonan Ekonómiko, Sosial i Kultural (CESCR), ku a tuma lugá na Ginebra dia 16 i 17 di sèptèmber 2025. Durante e proseso ei, BHRO a biaha bai Nashonan Uni na Ginebra I a entrega I ekspresá preokupashon tokante informashon relashoná ku Boneiru ku, segun nos evaluashon, no tabata reflehá adekuadamente e realidat ku e pueblo ta biba diariamente.

Ta importante pa señalá ku e konklushonnan posterior di Nashonnan Uni a identifiká desigualdatnan serio i preokupashonnan kontinuo tokante e garantia i ehersisio pleno di derechonan ekonómiko, sosial i kultural. E Komité tambe a ekspresá preokupashon tokante e falta di informashon relashoná ku implementashon di e derechonan aki na Boneiru, Saba i Sint Eustatius.

Pa BHRO, e konklushonnan aki ta partikularmente importante, pasobra nan ta fortalesé nos preokupashon ku e realidatnan ku hende riba e islanan ta eksperensiá no tabata wordu reflehá adekuadamente den e informashon presentá internashonalmente.

BHRO a presentá Nashonnan Uni ku informashon ku a bini direktamente for di pueblo tokante pobresa, e kosto haltu di bida, bibienda, kuido di salú, enseñansa, diskriminashon, desigualdat i e falta di garantia igual di derechonan fundamental. E kontribushonnan di BHRO a yuda trese e realidat ku e pueblo ta biba diariamente direktamente dilanti di e mekanismo internashonal pa derechonan humano.

BHRO tambe ta preokupá tokante e echo ku Gobièrnu Hulandes ta finansiá e Instituto. Ora ku un instituto ta risibí finansiamentu for di e mesun Estado ku ta verwagt ku e ta kumpli ku su obligashonnan di derechonan humano I mester evaluá di manera independiente i krítiko, transparensia i garantianan efektivo ta esensial. Un relashon asina ta lanta preguntanan legítimo tokante independensia institushonal, posibel influensia riba e informashon ku ta wordu presentá i e narrativa ku ta wordu komuniká na públiko i na mekanismonan internashonal pa derechonan humano.

Dikon e Instituto Hulandes pa Derechonan Humano no ta kuestioná si e inkorporashon di Boneiru den e órden konstitushonal hulandes, ignorando e deseo ekspresá i e desishon demokrátiko di pueblo Boneriano i bou di kondishonnan di derechonan desigual, no ta di akuerdo ku Artíkulo 1 di tantu e Pakto Internashonal tokante Derechonan Sivil i Polítiko (ICCPR) komo e Pakto Internashonal tokante Derechonan Ekonómiko, Sosial i Kultural (ICESCR)? Esaki ta e derechonan fundamental humano di tur pueblo, inkluso Boneiru na autodeterminashon, mediante kual nan ta determiná libremente nan status polítiko i e rumbo di nan desaroyo ekonómiko, sosial i kultural.

P’esei, BHRO ta urgí e pueblonan di Boneiru, Statia i Saba pa mantené nan mes informá, hasi pregunta, dokumentá nan eksperensianan i evaluá krítikamente si e informashon presentá ta korespondé ku e realidat ku nan ta biba tur dia.

Edukashon tokante derechonan humano ta importante, pero nos pueblo ta meresé informashon ku ta independiente, korekto, transparente i basá riba nan realidat bibá.

FUENTE: BONAIRE HUMAN RIGHTS ORGANIZATION