DESPUES DI A INFORMABO E ÚLTIMO SIMANNAN RIBA BO DERECHONAN KOMO TRAHADÓ TANTU PA NOS LEINAN LABORAL I TAMBE SI BO TA KAI BOU DI UN CAO.

HEI , ABO TRAHADÓ, BO KONOSÉ BO DERECHO ?

Kraledijk,- Awe mi kier informabo riba bo derechonan fundamental ku bo tin komo miembro di un sindikato. Na promé lugá ora bo ta miembro di un sindikato, e sindikato mester dunabo su statutonan i su reglanan doméstiko i prueba ku e ta inskribí den Kámara di Komersio i ku e ta paga anualmente su miembresia den e Kámara.

E inskripshon den Kámara ta importante pasobra, esei ta duna e sindikato e derecho di negoshá kontraktonan kolektivo i ku e por partisipá legalmente den komunidat den representashon di e trahadónan ku ta afiliá na dje. Statuto i Reglamentu Domésiko ta importante, pasobra ta ei den tin ankrá bo derechonan i obligashonnan komo miembro.

Obligashonnan manera paga bo kontribushon, asistí na reunionnan konvoká pa direktiva, pero tambe derechonan ku e sindikato ta brindabo manera entre otro.

Dunabo yudansa i konseho den momentonan di konflikto laboral, pone na bo disposishon un abogado pa si dado kaso bo mester bai korte i bo no ta kai bo asistensia hurídiko di ministerio di asuntunan sosial i di labor. E tin ku splikabo benefisionan ku e sindkato ta dunabo, manera entre otro rebaho ora bo hasi kompra na sierto kompanianan, informashon i formashon atraves di kursonan i/o nochinan di formashon o tayernan di trabou..

Dunabo asistensia i konseho den kasonan di problema personal i indikábo na e instansianan korekto pa bo haña yudansa. I naturalmente e meta prinsipal negoshá mihó kondishonnan i sirkumsansianan laboral pa asina hisa bo kalidat di bida.

Tambe i esaki ta importante abo komo miembro tin e derecho  i bo direktiva  tin e obligashon statutario pa anualmente duna kuenta i rason na miembronan di aktividatnan sindikal ku a tuma lugá durante e aña i hopi importante duna kuenta i rason finansiero, esta kon i na unda a usa e fondonan di kontribushon i otro fondonan ku e sindikato ta generá.

I den tur statuto di e sindikato tin pará kiko miembronan mester hasi dado kaso e direktiva no ta kumpli ku e reglanan aki, esta di duna kuenta i rason di tantu aktividatnan komo  kuenta i rason finansiero.

Den un kaso asina un kantidat di miembronan por pidi pa tene un reunion, i si esaki no tuma lugá boluntariamente nan mes lo por yama un reunion i tuma desishonnan legítimo i legal.

Un kaso ekstremo asina ta tambe ora ku e direktiva no ta organisá manera su statuto ta preskribí pa kada tantu aña organisá un reunion general pa eligí un direktiva nobo.

Un situashon sindikal kaminda no ta kumpli ku e reglanan statutario i ku miembresia ta pasivo i ta laga kos bai no ta sano i ta krea un sindikalismo no funshonal manera su meta ta deskribí den su statutonan. Sindikatonan mester ta konsekuente i konsistente den nan maneho interno.

Meskos ku nan ta eksigí pa dunadónan di trabou tin ku kumpli ku lei- i reglanan, nan mes tambe mester duna e ehèmpel den nan sindikato. Esaki lo hasi sindikalismo fuerte, lo krea konfiansa di trahadó den sindikato i mas ku tur kos ta krea rèspèt i rekonosimentu pa e bos di trahadó den desaroyo sosial-ekonómiko di nos isla.

Nunka lubidá ku ta trahadó i su famia ta forma e gran mayoria den kualiker komunidat. Meskos ku AFBW a krese a base di konfiansa ku ela krea i a base di kumpli kabalmente ku su statutonan pa loke ta duna kuenta i rason finansiero a base di un kuenta anual kontrolá pa un accountant i tambe kada tres aña tene un elekshon pa un direktiva nobo, asina tur sindikato aki na Boneiru mester hasi.

I si e direktiva no ta hasiele, miembronan mester mobilisá i pidi e direktiva kuenta i rason. Ta boso derecho.  

Kurason i wes’i lomba di un sindikato ta militansia di su miembresia. Sinta na banda laga otro hasi e trabou no ta opshon, partisipá aktivamente ta fundeshi di un funshonamentu demokrátiko di un sindikato tambe.

FUENTE: NORWIN NÒCHI WILLEM/LIVE99FM